Sholohovpen birge Nobel syılyǵyna talasqandardyń esimderi endi ǵana belgili boldy
ASTANA. QazAqparat - Shved koroldigi akademııasynyń arhıvi 1965 jyly ádebıet salasy boıynsha Nobel syılyǵyna nomınant bolǵandardyń esimderin jarııalady.
Akademııa arhıviniń qujattarynda kórsetilgen málimetke sáıkes, olar - Frantsııada turǵan orys jazýshysy Vladımır Nabokov, Chılı aqyny Pablo Nerýda jáne argentınalyq Horhe Lýıs Borhes, dep habarlaıdy Lenta.ru. Bulardyń arasynan tek Pablo Nerýda ǵana keıin, 1971 jyly osy syılyqqa qol jetkize aldy.
Syılyq berý jónindegi túpkilikti sheshimdi shyǵaratyn akademııa óziniń erejesi boıynsha nomınant atanǵanymen, syılyqqa qol jetkize almaı qalǵan qalamgerlerdiń aty-jónderin 50 jylǵa deıin qupııa ustaıdy. Tek osynsha ýaqyt ótkennen keıin ǵana talasqa túsken úmitkerlerdiń tolyq quramyn jarııa etedi. Osylaısha bizge 1965 jylǵy kandıdattar qatarynda, joǵaryda atalǵandardan bólek, brıtanııalyqtar Ýısten Hıý Oden, Lorens Darrel, Leslı Poýlz Hartlı, Sommerset Moem jáne Alan Sıllıtoý bolǵany da endi málim bolyp jatyr. Bulardyń arasynan birde-bireýi keıin Nobel syılyǵyn ala almady. Tek sol jyly nomınant bolǵan ırland jazýshysy, aqyn, dramatýrg Semıýel Bekket keıinirek, 1969 jyly syılyq ıegeri atanady.
Keńes jazýshysy Mıhaıl Sholohov atalǵan syılyqty «Tynyq Don» trılogııasy úshin aldy. Onyń aldynda, 1958 jyly keńestik taǵy bir qalamger - Borıs Pasternakqa osy syılyq berilgen bolatyn. Biraq jazýshy keńestik ıdeologııanyń qysymy saldarynan odan resmı túrde bas tartty, dep jazady egemen.kz.
