«Shóldegi Davos»: Er-Rııad jasandy ıntellektige ınvestıtsııa tartyp jatyr
ASTANA. KAZINFORM – Saýd Arabııasynyń astanasy Er-Rııadta álemdegi eń iri ınvestıtsııalyq alańdardyń biri – Future Investment Initiative (FII9) halyqaralyq forýmy jumysyn bastady, dep habarlaıdy Saudi Press Agency.
«Órkendeýdiń kilti» uranymen ótken forýmnyń 9-sessııasy jahandyq kóshbasshylardy, ınvestorlardy jáne iri bıznes ókilderin biriktirip otyr. Negizgi nazar jańa ekonomıkalyq yntymaqtastyq modelderine, tehnologııalardyń damý yqpalyna jáne memlekettik-jekemenshik seriktestikti nyǵaıtýǵa aýdarylǵan.
Forým Er-Rııadtaǵy korol Abdýlazız atyndaǵy konferents-ortalyǵynda ótýde. Oǵan memleket basshylary, mınıstrler, táýelsiz qorlar men jetekshi kompanııalardyń basshylary jáne sarapshylar qatysýda. Sonymen qatar AQSh-tyń iri ınvestıtsııalyq korporatsııalary Goldman Sachs, JP Morgan, BlackRock jetekshileri, sondaı-aq Donald Tramptyń uly jáne Qytaı vıtse-prezıdenti Han Chjen bar.
Saýd Arabııasynyń Memlekettik ınvestıtsııalyq qorynyń basqarýshysy jáne Saudi Aramco dırektorlar keńesiniń tóraǵasy ıAsır ar-Rýmaııan forýmdy ashý barysynda sońǵy on jyl ishinde FII alańy arqyly 250 mıllıard dollardan astam kelisim jasalǵanyn atap ótti.
Onyń aıtýynsha, álemdik ekonomıka qarqyndy tehnologııalyq ózgerister dáýirin bastan ótkerip otyr jáne bul kezeńde úkimetter men bıznes qurylymdarynyń ortaq áreketi asa mańyzdy.
«Bizge halyqaralyq yntymaqtastyqtyń jańa modelin qalyptastyrý qajet. Tek birikken kúsh-jiger ǵana „ortaq órkendeý dáýirin“ qamtamasyz ete alady», — dedi ar-Rýmaııan.
Ol qazirgi álemdik ekonomıkanyń kólemi 111 trıllıon dollardan asqanyn, biraq adamdardyń jeke kútýleri men bolashaqqa degen senimi arasynda alshaqtyq bar ekenin atap ótti.
«Búginde adamdardyń 66 paıyzy óz ómirine rıza, alaıda tek úshten biri ǵana álemniń bolashaǵyna senimmen qaraıdy», - dedi ol.
ıAsır ar-Rýmaııannyń aıtýynsha, tehnologııalyq progress teńsizdikti azaıtýdyń quralyna aınalýy tıis, biraq jasandy ıntellektiniń ósýi bilim berý men múmkindikterge qoljetimdilik arasyndaǵy aıyrmashylyqty tereńdetip otyr.
Saýd Arabııasy Vision 2030 strategııasyn iske asyrý aıasynda jańa qalalar, ınnovatsııalyq óndirister men jetkizý tizbekterin damytyp, sheteldik ınvestıtsııalar kólemin 24 paıyzǵa arttyryp, 31,7 mıllıard dollarǵa jetkizgen.
Future Investment Initiative Institute atqarýshy dırektory Rıchard Attıas forýmnyń ashylýynda FII alańynyń tek pikir almasý emes, bolashaqty qalyptastyrý ornyna aınalǵanyn aıtyp, densaýlyq saqtaý, jasandy ıntellekt jáne adamı kapıtaldy damytý salalaryndaǵy seriktestik pen ınnovatsııanyń mańyzyn atap ótti.
Buǵan deıin habarlanǵandaı, Saýd Arabııasy Vision 2030 baǵdarlamasy aıasynda Mekkede jańa megajoba iske qosýdy josparlap otyr.