Shóldaladaǵy sarbaz sýıtsıdi: 5 adam laýazymynan bosatyldy
Bul týraly Ulttyq qaýipsizdik komıteti Shekara qyzmeti Tárbıe, ıdeologııalyq jáne kadrlyq jumys departamenti bastyǵynyń orynbasary – kadrlar basqarmasynyń bastyǵy Erik Berikov aıtty, dep habarlaıdy QazAqparat tilshisi.
Búgin Ortalyq kommýnıkatsııalar qyzmetindegi baspasóz máslıhatynda tilshiler Jambyl oblysy «Shóldala» beketinde sarbaz óliminen keıin shekaradaǵy basshylyq quramnan kimder jaýapqa tartylǵany jóninde suraq qoıdy.
«Bul fakt boıynsha tergeý amaldary aıaqtalyp, Shymkent garnızony boıynsha áskerı sotqa materıaldar jiberildi. Qazir zań talaptaryna sáıkes, tergep-tekserý materıaldaryn jarııalaı almaımyn», - dedi E. Berikov.
Onyń aıtýynsha, bul oqıǵadan keıin 5 adam qyzmetinen bosatylǵan.
«Atqaryp jatqan laýazymynan oblystyq departamenttiń basshysy, shekara basqarmasynyń basshysy, zastava basshysy, sondaı-aq tárbıe isi jónindegi jaýapty orynbasarlary bosatyldy», - dedi Erik Berikov.
Bas áskerı prokýratýra 2022 jyldyń tamyzynda «Shóldala» shekara zastavasynyń merzimdi áskerı qyzmetshisi B.Mırashtyń óz-ózine qol salý deregine qatysty tergeý barysyn málimdedi.
«Búgingi kúni bılikti asyra paıdalaný arqyly ózin-ózi óltirýge deıin jetkizý boıynsha kúdikti retinde sol zastavanyń kelisimshart boıynsha áskerı qyzmetshisi tergelýde. Qylmystyq is materıaldaryna sáıkes ol B.Mırashty jáne onymen birge áskerge shaqyrylǵan basqa da merzimdi áskerı qyzmetkerlerdi júıeli túrde psıhologııalyq turǵyda qorlap, soqqyǵa jyqqan. Kúdikti qamaýǵa alynyp, tergeý jalǵasýda jáne erekshe baqylaýǵa alynǵan», - dep jazdy vedomstvodan.
Bıyl aqpan aıynda «Shóldala» shekara bólimshesindegi jaýynger ólimi faktisi boıynsha ishki tergeý júrgizilip, birneshe adam qyzmetinen shettetilgenin jazǵan edik.
