Shóldaladaǵy sarbaz ólimi: Aıypty serjanttyń úkimi qatańdap, 7 jylǵa deıin uzardy
Jambyl oblysynda sarbazdy qorlaǵan áskerı qyzmetshige jańa úkim shyqty, dep habarlaıdy Kazinform áskerı sotqa silteme jasap.
Qylmystyq ister jónindegi sot alqasy kúsh qoldanyp bopsalady (QK 194-baby 2-bóligi 1-tarmaǵy) jáne ókilettigin asyra paıdalandy (451-baptyń 1-bóligi) dep aıyptalǵan shekara zastavasynyń serjanty N-ǵa shyqqan úkimniń kúshin joıdy.
Ol sondaı-aq B. degen sarbazdy óz-ózine qol jumsaýǵa ıtermeledi (QK 451-babynyń 2-bóligi jáne 105-babynyń 2-bóliginiń 1-tarmaǵy) degen kúdikke ilingen edi.
Eske sala keteıik, 24 tamyzda Shymkent garnızony áskerı sotynyń úkimimen serjant N. QK 194-baby 2-bóligi 1-tarmaǵy jáne 451-baptyń 1-bóliginde kózdelgen qylmystardy jasaǵany úshin kináli dep tanyldy. Biraq 105-baby 2-bóliginiń 1-tarmaǵy jáne 451-babynyń 2-bóligi boıynsha aqtaldy.
Sóıtip 3 jyl 6 aıǵa bas bostandyǵynan aıyrylǵan.
Sotta anyqtalǵany - N. shekara zastavasynda kelisimshart boıynsha mobıldi toptyń basshysy qyzmetin atqarǵan.
2022 jylǵy tamyzda ol áskerı qyzmetshiler Qarýly Kúsh jarǵysyn buzyp, narıadtaǵy beketterdi óz erkimen aýystyrǵanyn anyqtaıdy.
N. osyny paıdalanyp, jábirlenýshi Q-dan aqsha bopsalaıdy, sosyn ol atalǵan somany sottalýshynyń bank shotyna aýdarǵan.
N. shekara zastavasynyń aýmaǵynda alkogol ishken jábirlenýshi B, K, A-ny kórip, qyzmettik ókilettigin asyra paıdalanyp, olarǵa dene jaraqatyn salǵan.
Keıinnen sottalýshy N. osy sebepti júıeli jáne negizsiz paıdalanyp, ókilettik sheginen shyǵyp, áskerı qyzmetshi B-nyń ar-namysy men qadir-qasıetin qorlap, bul sarbazdyń óz-ózine qol jumsaýyna ákep soqqan.
Sottalýshynyń kinási jábirlenýshilerdiń, kýágerlerdiń aıǵaqtarymen, zattaı dáleldemelerdi qarap tekserýmen, onyń ishinde bank shotynan úzindi kóshirmemen, shekara zastavasynan alynǵan beınejazbamen jáne qylmystyq istiń basqa da materıaldarymen dáleldendi.
Qylmystyq ister jónindegi sot alqasy jańadan úkim shyǵaryp, áskerı qyzmetshi N-ny QK 194-baby 2-bóligi 1-tarmaǵy jáne 451-baptyń 1-bóliginde kózdelgen qylmystardy jasaǵany úshin kináli dep tanydy.
Ol 7 jylǵa bas bostandyǵynan aıyryldy.
Úkim zańdy kúshine endi.
Eske sala keteıik, Bas áskerı prokýratýra byltyr tamyzda «Shóldala» shekara zastavasynyń merzimdi áskerı qyzmetshisi B. Mırashtyń ózine qol salý deregine qatysty tergeý júrip jatqanyn málimdegen.
Bıyl aqpan aıynda «Shóldala» shekara bólimshesindegi jaýynger ólimi faktisi boıynsha ishki tergeý júrgizilip, birneshe adam qyzmetinen shettetilgen edi.
Sarbaz óliminen keıin bes adam jumystan bosatylǵan.
24 tamyzda sarbazdyń ózin óltirýine sebepshi boldy degen áskerı qyzmetshini sot aqtady, degenmen basqa bap boıynsha 3,5 jylǵa sottaǵan.
Keıin Bas áskerı prokýratýra sarbaz Bekbol Mırashtyń ólimine qatysty úkimmen kelispeıtinin málimdedi.
