Shól dalanyń ortasyndaǵy oazısteı Astanamyz bolashaqta Qazaqstannyń ortalyǵyna qaraı jaıyla túsetindeı - ýnıversıtet oqytýshysy
ALMATY. 11 shilde. QazAqparat - Astana - múmkindikteri sheksiz, bolashaǵy orasan zor qala. Sanjar Asfendııarov atyndaǵy Qazaq ulttyq medıtsına ýnıversıtetiniń oqytýshysy Baný Handildaevanyń aıtýynsha, bul QR Prezıdentiniń «Astana - Qazaqstannyń uly dáýiri jáne strategııalyq vektory» atty maqalasynda aıqyn ańǵarylady.
«Eýrazııanyń júregi ispetti Astana shyǵys ertegilerindegideı ǵajaıyptan paıda bolǵan bir keremet sııaqty. Onyń bolashaǵyn elesteter bolsam - sanama san oılar kelip, júregim alaburtyp soǵyp ala jóneledi. Shól dalanyń ortasyndaǵy oazısteı Astanamyz bolashaqta Qazaqstannyń ortalyǵyna qaraı jaıyla túsetindeı», - deıdi B. Handildaeva. Ǵalymnyń sózine qaraǵanda, aınalasy jasyl jelekke oranyp, kún saıyn boı kóterip jatqan kókpen talasqan ásem ǵımarattardyń arqasynda Astana jyldan-jylǵa jasara beretindeı kórinedi. Qazaqstannyń saıası, bilim, ǵylym, mádenıet jáne damyǵan zamanaýı tehnologııalar ortalyǵyna aınalyp kele jatqan elordasy osy baǵytta, osy qarqynmen toqtamaı jyljıtyn bolsa, kóp uzamaı-aq jer betindegi eń ádemi, eń sáýletti, damyǵan qalalar sanatyna enetinine esh kúmán joq.
