Shoqyný dinı merekesi kúnderi astanada qutqarýshylar jumysy kúsheıtiledi

ASTANA. QazAqparat – «Kreşenıe Gospodnıa» pravoslavıelik dinı merekesi kúnderi elordanyń tótenshe jaǵdaılar mamandary kúsheıtilgen rejımde jumys isteıdi, dep habarlaıdy QazAqparat tilshisi.

«19 qańtarda jappaı shomylý kezinde adamdardyń qaýipsizdigin qamtamasyz etý maqsatynda kezekshilik bolady. ıAǵnı shomylý oryndarynda jedel-qutqarý jasaǵynyń jáne Apattar medıtsınasy ortalyǵynyń qyzmetkerleri kúsheıtilgen tártippen jumys isteıdi. Atalǵan sharaǵa jeke quramnan 31 adam jáne 6 tehnıka jumyldyrylady. Sýǵa túsetin oryndarda uıymdastyrýshylar men qatysýshylarǵa qosymsha nusqama ótkiziledi»,– dedi Astana qalasy TJD Azamattyq qorǵanys basqarmasy bastyǵynyń mindetin atqarýshy Azamat Qusaıynov elordanyń kommýnıkatsııalar qyzmeti alańynda ótken brıfıngide.

Sondaı-aq TJD ókili kimderge sýǵa túsýge bolmaıtynyn aıtty.

«Kreşenıe merekesinde balalar men qarttarǵa, salqyn sýǵa túsýde tájirıbesi joq adamdarǵa, sonymen qatar júrek-qan tamyry aýrýlary barlarǵa shomylýǵa keńes berilmeıdi», - deıdi ol.