Shoqpartoǵaıdaǵy «Baldáýren» - «Igilikpen» iske asqan nysandardyń biregeıi
ATYRAÝ. QazAqparat - Sońǵy ýaqytta shalǵaıda ornalasqan aýyldarda jurtshylyqtyń rýhyn asqaqtatar qýanyshty sátter kóbeıip keledi. Sózimizge dálel, Jylyoı aýdanynyń Qara Arna aýyldyq okrýgine qarasty Shoqpartoǵaı aýylynda kúni keshe paıdalanýǵa berilgen «Baldáýren» balabaqshasyn aıtýǵa bolady, dep jazady «Atyraý» gazeti .
Erte jastan balalardy qabyldaıtyn tálim-tárbıe ornynyń jabdyqtalýy qaladaǵy mekemelerden kem emes. Óz kezegimizde atalǵan búldirshinder baqshasymen tanysqan edik. Aıta keteıik, atalmysh balabaqsha elimizdegi eń iri munaı-gaz óndiretin kásiporyn - «Teńizshevroıl» JShS-niń qarjylandyrýymen salynǵan. Elimiz táýelsizdik alǵan jyldary qazaq jerinde jumysyn bastap, elmen birge eseıgen kásiporyn óńirdegi kóptegen ıgi isterdiń uıytqysy bolyp kele jatyr. Tarıhqa kóz júgirtsek, 1993 jylǵy 6 sáýirde Elbasy Nursultan Nazarbaev pen Kennet Derr Almaty qalasynda «Teńizshevroıl» birlesken kásipornyn qurý týraly 40 jyldyq kelisimge qol qoıdy. Qazaqstan úshin ǵana emes, «Shevron» korporatsııasy úshin de bul mámile 1970-shi jyldardyń basynan bergi eń iri halyqaralyq mámile edi. Osy Qazaqstan-Amerıka munaı kelisim-shartyna qol qoıylýynyń búkil dúnıe júzi úshin ekonomıkalyq qana emes, saıası mańyzy boldy.
1992 jyly Qazaqstan, Reseı jáne Oman úkimetteri Kaspıı qubyr konsortsıýmyn (KQK) qurý týraly qujattarǵa qol qoıdy. Teńiz-Novorosıısk munaı qubyry arqyly Teńiz munaıynyń álemdik naryqtarǵa eksportqa shyǵarylýyn qamtamasyz etýge tıis boldy. Osylaısha Qazaqstannyń orasan zor munaı alybynyń jáne jalpy el ekonomıkasy damýynyń jańa kezeńi bastaldy. «Teńizshevroıl» JShS san mıllıardtap tartylǵan ınvestıtsııalardy tıimdi ıgerýdiń arqasynda «TShO» óndiristiń búkil ınfraqurylymyn túbegeıli qaıta quryp, óndiris bazasyn keńeıtti. 1993 jyly «Atyraý Bonýs Qory» dep atalatyn bes jylǵa arnalǵan baǵdarlamasyn engizýden bastady. Nátıjesinde, áleýmettik, mádenıet jáne turmystaq sala nysandary, aýrýhana, turǵyn úı salynyp, halyq ıgiligine usynyldy.
Bes jyldyq baǵdarlamanyń ornyna qazir «Igilik» dep atalatyn áleýmettik jobalar baǵdarlamasy keldi. Jobany iske asyrýda Atyraý qalasyndaǵy Jaıyq ózeninen ótetin bas kópirdi qaıta jańǵyrtýdan bastady. Atyraý ýnıversıtetiniń jańa ǵımaratyn salýdy, qaladaǵy ǵımarattardy jańartýdy jáne Jaıyq ózeniniń jaǵasyn bekitýdi qolǵa aldy. Sonymen qatar, Atyraý oblysynyń, Jylyoı aýdanyndaǵy jáne Atyraý qalasyndaǵy mádenıet mekemelerine, balalar úılerine, ınternattarǵa, qarttar úıine, aýrýhanalar men klınıkalarǵa, múgedekter uıymdaryna jáne turmys deńgeıi tómen adamdarǵa demeýshilik kómek kórsetýde. Biz áńgimelep otyrǵan Shoqpartoǵaı aýylynda irge kótergen erte jastaǵy búldirshindi qabyldaıtyn «Baldáýren» baqshasy da - «Igilik» baǵdarlamasynyń ıgiligi.
Eldiń danasy da, darasy da aýyldan shyqqan. Erteńgi kósh bastaıtyn azamattar da aýyldan bolyp qalar. Sondyqtan balany erte jastan tálim men tárbıege baýlýdyń esh artyqtyǵy joq. Aýyldaǵy 160 oryndyq jańa balabaqshany salýǵa atalmysh kásiporyn 362 mıllıon 483 myń teńge jumsapty. Bul týraly mekemeniń qurylys jumystaryn júrgizgen «AtyraýRemStroı Montaj» JShS merdiger mekemesiniń dırektory Jánibek Sháripovten bilgen edik. Ótken jyldyń sáýir aıynda bastalǵan qurylys belgilengen merziminen buryn, ıaǵnı qarasha aıynda aıaqtalypty. Aǵymdaǵy jyldyń jeltoqsan aıynda paıdalanýǵa berilgen. - Balabaqsha bıylǵy jyly analar merekesi qarsańynda alǵashqy túlekterin qabyldady. Eki qabattan turatyn ǵımarattyń jalpy alańy - 1782 sharshy metr. Eki jylytý qazandyǵy ornatylǵan, jeli-júıelermen tolyqtaı jabdyqtalǵan. Jańa zamanaýı úlgide jasaqtalǵan balabaqshada 1,5-5 jas aralyǵynda jeti topta baldyrǵandar tárbıelenýde. Tómengi qatarda - úsh top, joǵarǵy qatarda tórt top ornalasqan,- deıdi balabaqsha meńgerýshisi Nella Eshibaeva. Balalar tamaqtanatyn as úı, medıtsınalyq oryn, kir jýý bólmesi de qarastyrylǵan. Oqý-tárbıe jumystary júrgiziletin toptyq bólmeden bastap, kıiný bólmesi, ashana, jatyn bólmesi, án-kúı men dene shynyqtyrý dáristerin ótkizetin ámbebap zaly, tanymdyq, shyǵarmashylyq qabiletin arttyrý úshin úıirme, koorektsııalyq úıirmeleri qyzmet etip tur. Barlyǵy talapqa saı jıhazdarmen, oıynshyqtarmen, oqý ádistemelik quraldarmen, ınteraktıvti taqtalarmen, teledıdarlarmen jabdyqtalǵan. «Otaý» TV qosylǵan. Balabaqsha meńgerýshisiniń aıtýynsha, munda balaqaılardyń alańsyz oınap, tynyǵýyna, jaqsy jatyp, jaıly turýyna qolaıly jaǵdaı jasalǵan. Balabaqshanyń ishi-syrtynda 32 beınebaqylaý júıesi ornatylypty. Syrtqy jaryqtandyrý úshin 20 metal baǵandy shamdar qosylǵan. Aýyldyń kóshesi túnde de qala sekildi jap-jaryq bolyp turady.
Óńirdegi qyryqtan astam jumyssyz jańa nysannyń paıdalanýǵa berilýimen jumyspen qamtylypty. Atap aıtqanda, «Jumyspen qamtý - 2020 jol kartasy» baǵdarlamasy boıynsha 16 jumyssyz, múgedek bala tárbıelep otyrǵan analar, «Altyn alqa» ıegeri men aýǵan soǵysy ardageri jumysqa ornalasqan. Aýyl turǵyndary balalaryna sheksiz qýanysh syılap, jaıly da saıly jańa balabaqsha syılaǵan «Teńizshevroıl» JShS mekemesine jáne is basyndaǵy azamattarǵa alǵystaryn jaýdyrýda. Kópshiliktiń rızashylyǵyna bólengen «Igiliktiń» ilgeri isteri qala ortalyǵynda da jalǵasyn taýyp otyrǵanyn kúnde kórip júrmiz.
