Shoqpar stansasynda poıyz qozǵalysy tolyǵymen qalpyna keldi
NUR-SULTAN. QazAqparat - Vagondar joldan shyǵyp ketken Shoqpar stansasynda jolaýshylar poıyzynyń qozǵalysy tolyǵymen qalpyna keldi, dep habarlaıdy QazAqparat «Qazaqstan temir joly» AQ baspasóz qyzmetine silteme jasap.
Esterińizge sala keteıik, keshe saǵat 01.30-da Shoqpar stantsııasyna 45 km/saǵ jyldamdyqpen kelgen júk poıyzynyń eki vagony joldan shyǵyp ketip, tsısternadan aqqan benzınnen órt shyqqan bolatyn. Keıin oqıǵaǵa baılanysty arnaıy komıssııa quryldy.
Aldyn ala boljam boıynsha, apattyń shyǵý sebebi - «HOLDING» RTS JShS jekemenshik kompanııasyna tıesili tsısternanyń dońǵalaq juby osiniń ortańǵy bóliginiń synyp ketýi.
Oqıǵa ornynda qalpyna keltirý jumystary jalǵasýda. Temirjolshylar poıyzdardyń qozǵalys kestesin qalpyna keltirý úshin barlyq múmkindikterdi jasap otyr. Ýchaske boıynsha 12 jolaýshy jáne 10 júk poıyzy ótti.
Kesteden keshikken poıyzdardyń jolaýshylaryna qajetti kómek kórsetildi. Atap aıtqanda, Espe stantsııasynda №44 poıyzdyń jolaýshylary, júkti áıelder Shý qalasynyń aýdandyq aýrýhanasyna jetkizildi.
Stansalarda jolaýshylardy aýyz sýmen jáne azyq-túlikpen qamtamasyz etýge arnalǵan oryndar ashyldy. Shý stantsııasy men vokzaly basshylyǵy jolaýshy poıyzdarynyń brıgadalarymen birlesip, bılet qunyn qaıtarý jáne kelgen qolaısyzdyq úshin ótemaqy tóleý sekildi máselelerdi sheship jatyr.
Shý stantsııasynyń perronynda poıyz jolaýshylaryna bıotýaletter ornatyldy jáne ketýge nıet bildirgenderdi avtokólikke otyrǵyzyp jiberdi.
Jolaýshy poıyzynyń keshikkeni úshin aıyppul jolaýshynyń ótinishi boıynsha árbir kidiristiń tolyq saǵaty úshin bılet qunynyń úsh paıyzy mólsherinde, biraq bılet qunynan aspaıtyn somada tólenedi.
