«Shoqpar-2013» oqý-jattyǵýy bastaldy - QR Qorǵanys mınıstrligi
QR QM baspasóz qyzmetiniń málimetinshe, «Ońtústik» jáne «Astana» óńirlik qolbasshylyqtarynyń qurylymdary men áskerı bólimderi, Aeroutqyr áskerleri tolyq jaýyngerlik ázirlikke keltirilip, Jambyl oblysy Gvardeısk garnızonynyń «Mátibulaq» polıgonyna attanyp ketti.
Atalǵan jattyǵýǵa tórt jarym myńnan astam áskerı qyzmetshi men tórt júzden astam jaýyngerlik tehnıka tartylyp otyr. Jattyǵýǵa motoatqyshtar, tankıster, artıllerıster, desantty-shabýyldaýshylar jáne arnaıy bólimshelermen birge armııalyq avıatsııa da qatysatyn bolady.
«Shoqpar-2013» jattyǵýynyń ereksheligi shartty túrdegi qarýly qaqtyǵysqa qatysýshylar eki jaqqa bólinip, jaýmen urys kezinde sheshim qabyldaýdy, operatsııany júrgizýdi josparlaýdy júzege asyrady. Sonymen qatar, jattyǵýǵa qatysýshylar alda bolatyn is-qımyldar týraly qandaı da bir aqparattan beıhabar.
Áskerler ózderiniń jaýyngerlik tapsyrmalaryn belgilengen aýdanǵa kelgennen keıin alyp, jaýyngerlik is-qımyldardy josparlap, uıymdastyrýǵa kirisedi.
«Zamanaýı qarýly qaqtyǵystardaǵy álemdik tájirıbege súıene otyryp jáne Qorǵanys mınıstri Ádilbek Jaqsybekovtiń talaptaryna sáıkes jattyǵýdaǵy negizgi kúsh áskerlerdi búgingi kúnniń qaýip-qaterine qarsy standarttan tys qımyldaýǵa oqytýǵa baǵyttalyp otyr»,-deıdi oqý-jattyǵýdyń jetekshisi Qurlyq áskerleriniń bas qolbasshysy general-leıtenant Murat Máıkeev.