Shokoladtaǵy tosyn syı: elge esirtki alyp kirmek bolǵan Reseı azamaty ustaldy

QOSTANAI. QazAqparat – Qostanaı oblysyndaǵy «Qaıraq» shekara beketinde reseılikten Kinder shokoladyna tyǵylǵan esirtki tárkilendi, dep habarlaıdy QazAqparat oblystyq polıtsııa departamentine silteme jasap.

Oblystyq polıtsııa departamentiniń Esirtki qylmysyna qarsy is-qımyl basqarmasy men Qarabalyq aýdandyq polıtsııa qyzmetkerleri jáne Qostanaı oblysy boıynsha UQK Shekara qyzmetiniń qyzmetkerleri «Qarasora 2023» jedel aldyn alý sharasy aıasynda reseılikten esirtki zattaryn tárkiledi. Ol marıhýanany shekaradan «Kinder sıýrprız» shokoladyna salyp ótkizbek bolǵan.

«Reseıge qaraı shekarany kesip ótken jolaýshyny tekserý kezinde qyzmettik-izdestirý ıti esirtkiniń ıisin sezdi. «Sizde tyıym salynǵan zattar bar ma?» degen suraqqa er adam «ıá» dep jaýap berdi. Esirtki zattary qaıda turǵanyn suraǵanda, ol ishinde úsh gramm marıhýana bolǵan «Kinder tosyn syıyn» berdi», - dedi oblystyq polıtsııa departamenti Esirtki qylmysyna qarsy is-qımyl basqarmasynyń bastyǵy Nurjan Ahmetov.

Qazirgi ýaqytta eki bap – QR QK 286 «Kontrabanda áreketi», sondaı-aq QR QK 296-baby «Esirtki quraldaryn saqtaý» boıynsha sotqa deıingi is júrgizý bastaldy. Tıisti saraptamalar taǵaıyndaldy, qajetti tergeý áreketteri júrgizilip jatyr.

Oblystyq polıtsııa departamenti baspasóz qyzmetiniń málimetinshe, «Qarasora» jedel aldyn alý sharasy bastalǵannan beri polıtseıler zańsyz aınalymnan 10 keliden astam túrli esirtki zattaryn tárkilegen.