Shokolad júkti áıelderge paıdaly - ǵalymdar
ASTANA. QazAqparat - Kanadadaǵy Lavalıa ýnıversıtetiniń ǵalymdary shokoladty ekiqabat áıelder úshin paıdaly azyq-túlikterdiń qataryna qosty. Mamandardyń 12 apta júrgizgen tájirıbesi boıynsha shokolad jeý ishtegi náresteniń densaýlyǵyn jaqsartatyny belgili boldy, dep jazady sheteldik BAQ.
Tájirıbege júktilik merzimi alǵashqy úsh aıdaǵy jáne ekinshi úsh aıǵa ketken 129 áıel qatysty. Qatysýshylardyń bir toby kúnde quramynda kakaosy joǵary 30 gramm shokolad jese, ekinshi top kakaosy tómen shokolad jegen. Kelinshekterge tájirıbe aıaqtalǵan soń Dopler ýltradybystyq zertteýin jasady. Onyń kómegimen ishtegi náresteniń jáne bala joldastyń densaýlyǵy ólshenedi. Sonymen birge ǵalymdar áıelderdi bosanǵanǵa deıin baqylap júrdi. Shokoladty jeý bolashaq ananyń qan aǵymyn jaqsartyp, ishtegi balanyń durys ósýine oń áser etýi ǵalymdardy tańǵaldyrdy.
«Shokolad quramynda bolatyn flavonıdter balanyń densaýlyǵyna aıtarlyqtaı oń áserin tıgizdi. Ásirese ol qara shokoladta kóp. Sondyqtan da júkti áıelderdiń taǵam ratsıonyna shokoladty qosýǵa bolady. Ol ishtegi náresteniń densaýlyǵyna áser etip qana qoımaı, isinýden, qan qysymynyń kóterilýinen saqtaıdy» , - dedi dáriger Emmanýel Bıýjold.
