Shókeev jas qyzmetkerlerimen kezdesti
Bul jaıynda atalǵan qordyń baspasóz qyzmetinen málim etti, dep habarlaıdy QazAqparat.
«Qordyń kompanııalar toby ujymnyń úshten bir bóligin 25-ten 34 jasqa deıingi jastar quraıdy. Qyzmetkerlerdiń dál osy sanaty erekshe qulshynyspen eńbek etip, damýǵa talpynady jáne ósýdiń jańa múmkindikterin paıdalanýǵa árdaıym ázir. Sońǵy saýalnamaǵa sáıkes, olardyń 90 paıyzy kompanııanyń barynsha joǵary nátıjelerge jetýine eleýli úles qosýǵa daıyn», - dedi kezdesýdi ashqan Ómirzaq Shókeev.
Qor basshysy «Samuryq-Qazyna» AQ qorjyndyq kompanııalarynda bilikti jas mamandardyń kúshimen tsıfrlyq ken oryndaryn engizý tárizdi tehnologııalyq turǵydan óte kúrdeli óndiristik jobalar júzege asyrylyp jatqanyn alǵa tartty.
Kezdesýge qatysýshylar Qazaqstandaǵy munaı-hımııa salasynyń damýyn keńinen talqylady. Dúnıejúziliktiń banktiń málimetterine sáıkes, álemdik munaı-hımııa naryǵy 1 trln AQSh dollaryna baǵalanady. Munaı-hımııanyń sabaqtas salalarǵa mýltıplıkatıvti áseri joǵary. Munaı-hımııadaǵy bir jumys orny sabaqtas salalarda 7,2 deıin jumys ornyn qurady. Munaı-hımııa salasyna jumsalǵan 1 AQSh dollary el ekonomıkasy úshin 2,3 dollar ákeledi.
«KPI Inc.» JShS-niń basqarma tóraǵasy Ǵabıt Zakarııanyń atap ótýinshe, Atyraýdaǵy UIMHT AEA osy aıda Integratsııalanǵan gaz-hımııa kesheniniń birinshi kezeńi boıynsha qurylys jumystaryn bastaıdy. Polıpropılen shyǵarýǵa baǵyttalǵan jobanyń quny 2,6 mlrd AQSh dollaryna baǵalanýda. Jobanyń júzege asyrylý merzimi - 42 aı. Polıpropılen elektronıka jáne elektr qural-jabdyqtaryn qurastyrýda, qurylys materıaldaryn daıyndaýda, mashına jasaý, medıtsına jáne taǵy basqa salalarda qoldanylady.
Kezdesý Elbasynyń tapsyrmasymen 2013 jyldyń qarashasynda iske qosylǵan «Taý-Ken Altyn» affınajdy zaýytynda ótti. Kásiporyn ashylǵannan bergi 3 jyl 10 aıda 44 tonna altyn óndirildi jáne satyldy. Kiris kólemi 4 mlrd teńgeden asty. Kásiporyn qalyptalǵan (ınvestıtsııalyq) quımalardy shyǵarýdy, «Good Delivery» sapa belgisine ıe bolýdy, jeke zergerlik óndiristi damytýdy josparlap otyr.
