Shókeev Úkimet basshysynan Túrkistandaǵy nysandardy tezdetip aıaqtaýǵa yqpal etýdi surady
TÚRKІSTAN. QazAqparat - QR Premer-Mınıstri Asqar Mamınniń tóraǵalyǵymen ótken keńeste Túrkistan oblysyn damytý keleshegi jóninde baıandaǵan óńir basshysy Ómirzaq Shókeev jańa nysandardyń qurylysyn jedeldetýge qatysty usynys-pikirlerin jetkizdi, dep habarlaıdy QazAqparat tilshisi.
Atap aıtqanda, Ó.Shókeeev Túrkistan oblysynda jańa nysandar salatyn óńirler, ulttyq kompanııalar men bıznes ókilderiniń jobalyq-smetalyq qujattamalardy ázirleýdi jedeldetýdi surady.
«Sonymen qatar nysandardyń óndiristik jumys kestelerin sizdiń hattamalyq tapsyrmańyzben bekitip berýińizdi suraımyz. Qurylys jumystaryna qajetti qarjy kólemin bıýdjetterinen bólý joldaryn Almaty qalasy jáne Pavlodar oblysynyń tájirıbesi negizinde qaraýdy usynamyz. Indýstrııa jáne ınfraqurylymdyq damý mınıstrligi jobalardyń memlekettik saraptamadan qysqa merzimde ótkizý múmkindigin qarastyrsa. Tapsyrys berýshi «Samuryq-Qazyna» UÁQ» AQ Kongress-ortalyq nysanynyń jobalyq-smetalyq qujattamasyn daıyndaý barysynda qoldanystaǵy karerdi múmkindiginshe jertóle, qoıma jáne avtoturaq retinde paıdalaný múmkindigi eskerilse»,- dedi ol.
Óńir basshysy, sondaı-aq Túrkistan qalasynyń Damý tujyrymdamasyna sáıkes klımatty jaqsartý, qalany abattandyrý jáne qala ishindegi ırrıgatsııalyq júıelerdi qalpyna keltirý jumystary júrgizilip jatqanyn jetkizdi. Osy maqsatta Syrdarııa ózeninen kelip Arys-Túrkistan kanalyna quıatyn Túrkistan mashınalyq kanalynyń tehnıkalyq-ekonomıkalyq negizdemesi men jobalyq-smetalyq qujattamasyn tezdetip jasap, qurylysyn keler jyly aıaqtaý qajettigin aıtty.
«Túrkistan qalasy boıynsha jer telimderin memleket muqtajdyǵyna alý maqsatynda Úkimet rezervi esebinen qarjylandyrýǵa qoldaý kórsetkenińizge alǵys bildiremin. Qarjyny shuǵyl qarastyrý maqsatynda QR Úkimetiniń qaýlysyn ázirleý úshin Ulttyq ekonomıka mınıstrligine tıisti tapsyrma berýińizdi suraımyn. Respýblıkalyq mańyzy bar «R-31 Kentaý-Túrkistan» 0-26 shaqyrym jáne «Túrkistan-Sháýildir» 36-106 shaqyrym avtomobıl joldaryn birinshi sanatqa ótkizý boıynsha qaıta qurý jumystaryn QR Investıtsııa jáne ınfraqurylymdyq damý mınıstrligi tarapynan 2019-2020 jyldary iske asyrý qajet»,- dedi oblys basshysy.
Ákim sondaı-aq, Úkimet basshysynan Túrkistan oblysyndaǵy memlekettik qyzmetshilerdiń eńbekaqysyn jańa júıe - faktorly-baldyq shkalaǵa kóshirýge yqpal etýdi surady.
Eske salaıyq, Mınıstrler kabınetiniń basshysy búgin tańerteń Túrkistan oblysyna jumys saparymen keldi. Ol buǵan deıin oblystyń jańa ákimshilik iskerlik-ortalyǵynyń, 7 myń oryndyq stadıonnyń, Oqýshylar saraıynyń qurylys alańynda boldy. Sondaı-aq turǵyn úılerdiń, BAQ ókilderine arnalǵan jańa Medıaortalyqtyń jáne ózge de nysandardyń qurylysymen tanysty.
Budan keıin Asqar Mamın qalany damytý perspektıvalary jóninde keńes ótkizdi. Selektorlyq rejimdegi keńeske elimizdiń birqatar qala, oblys ákimderi men mınıstrlikterdiń ókilderi, jergilikti depýtattar men basqarma basshylary qatysty.
