Shókeev Túrkistandaǵy jańa nysandardy sapaly salyp, merziminde aıaqtaýdy eskertti
TÚRKІSTAN. QazAqparat – Túrkistan oblysynyń ákimi Ómirzaq Shókeev búgin Túrkistan qalasyndaǵy qazany qaınaǵan qurylys alańdaryn aralap shyqty. Aımaq basshysy bastaǵan top aldymen, «Turkistan» ındýstrıaldy aımaǵynda bolyp, «Nur-Sultan» alańynyń aldynda boı túzegen nysandarda atqarylyp jatqan jumystardy kórdi, dep habarlaıdy QazAqparat tilshisi.
«Turkistan» ındýstrıaldy aımaǵynda Polsha men Túrkııa elderiniń ınvestorlyq kompanııalary qurylys zattary men tómen qýatty sozba sym óndirý jelisin iske qospaq. Jospar boıynsha bul aýmaqta keler jyly taǵy 10 óndiris orny ashylady. Álemdik tájirıbege negizdele jasaqtalyp jatqan ındýstrıaldyq aımaq 100 ga jerdi alyp jatyr. Aldaǵy ýaqytta onyń aýmaǵy úsh ese artpaq. Óńirdiń ekonomıkasyn arttyrý baǵytynda ındýstrıaldyq aımaqtardyń jumysy júıelenip, árbir aýdannyń ereksheligi men múmkindigine qaraı damıtyn bolady. Al, «Nur-Sultan» alańynyń aldynda Jańa ákimshilik iskerlik ortalyǵy men Medıa ortalyǵynyń ishki bezendirý jumystary júrgizilýde. Almaty qalasynyń tapsyrysymen salynyp jatqan nysannyń jalpy kólemi – 3 myń sharshy metrdi quraıdy.
Túrkistan qalasynyń rýhanı-mádenı aımaǵynda Qostanaı oblysynyń tapsyrysymen «Neke saraıy» salynýda. Onyń jalpy aýmaǵy – 0,36 ga.
Aıta keteıik, oblys ortalyǵynda óńir ákimdikteri, ulttyq kompanııalar jáne bıznes ókilderi tarapynan 26 nysannyń qurylysy júrgizilýde. Jyl sońyna deıin 11 nysan paıdalanýǵa beriledi dep josparlanǵan. Ómirzaq Shókeev qurylys barysyn qadaǵalap, jumystardyń talapqa saı júrip jatqanyna kýá boldy.
Budan bólek, aımaq basshysy kógaldandyrý jumystarynyń barysyn baqylady. Kentaý tasjolynyń boıyna otyrǵyzylǵan kópjyldyq aǵashtar Túrkistandy jasyl aımaqqa aınaldyrady. Kógaldandyrý maqsatynda eń aldymen sýlandyrý júıesin jetildirý mańyzdy bolǵandyqtan, jazdyń aptap ystyǵynda egilgen aǵashtar men gúlder, shalǵyndarǵa sý jetkizý úshin qalanyń birneshe baǵytynan keletin kanaldar kúrdeli jóndeýden ótip jatyr.
