Shókeev: Túrkistandaǵy qurylys kompanııalar paıdany emes, saýapty isti de eskergeni durys
TÚRKІSTAN. QazAqparat - Búgin Túrkistan oblysynyń ákimi Ómirzaq Shókeev «BI group» holdınginiń dırektorlar keńesiniń tóraǵasy Aıdyn Rahymbaevpen kezdesti. Bul týraly QazAqparat ákimdiktiń baspasóz qyzmetine silteme jasap habarlaıdy.
Basqosý barysynda kompanııa ókilderi Túrkistan qalasyndaǵy qurylys barysyn baıandady.
«Qazirgi tańda «BI group» holdıngi Túrkistan qalasynda 5 nysannyń qurylysyn júrgizýde. Olar: Oblystyq ákimdik jáne basqarmalar men departamentterdiń ǵımaraty, ortalyq stadıon, Medıaortalyq, «Astana» alańy, «Uly dala eli» ortalyǵy. Oblystyq ákimdik ǵımaratyn aǵymdaǵy jyly aıaqtaýdy josparlap otyrmyz, al basqarmalar men departamentterdiń ǵımarattaryn 2020 jyldyń naýryz aıynda paıdalanýǵa beretin bolamyz. Stadıon, Medıaortalyq, «Astana» alańy men «Uly dala eli» ortalyǵynyń qurylys jumystary keste boıynsha júrýde», - dedi Aıdyn Jumadiluly.
Sondaı-aq, kompanııa ókilderi Túrkistan qalasynda boı kóteretin kópqabatty turǵyn úı alqaptaryna arnalǵan «Smart city» syndy aqyldy qala jobalaryn tanystyrdy. Onda árbir páterdiń jylý, jaryq, aýa tazalyǵyn baqylap otyratyn tsıfrly tehnologııalar qarastyrylǵan.
Oblys ortalyǵyndaǵy qurylys jumystarynyń barysymen habardar bolǵan óńir basshysy birqatar tapsyrmalar berdi.
«Túrkistanda qurylys jumystaryn júrgizýshi kompanııalar tek paıdany ǵana oılamaı, elge saýapty isti de eskergeni durys. Qasıetti qalany damytýǵa úles qosýdyń ózi úlken ıgilikti is. Bastysy, jańa ákimshilik ortalyqtaǵy boı kóteretin ǵımarattar ýaqytynda aıaqtalýy tıis. Syrtqy kelbeti men ishki qurylymy zaman talabyna saı bolýy kerek. Aqyldy qala jobasyn aldaǵy ýaqytta qolǵa alyp, seriktestik tanytatyn bolamyz. Sondaı-aq, tıisti basqarma basshylaryna ınfraqurylym máselesin der kezinde sheshýdi tapsyramyn. Turǵyn úılerdi salýda barynsha halyqqa qoljetimdi bolý jaǵyn basty nazarda ustaýymyz qajet», - dedi Ómirzaq Estaıuly.
