Shókeev «Shardara Armsport» klýbyna shaǵyn avtobýs tartý etti
ShARDARA. QazAqparat – Túrkistan oblysynyń ákimi Ómirzaq Shókeev Shardaradaǵy «Shardara Armsport» klýbynyń sportshylarymen kezdesti, dep habarlaıdy QazAqparat tilshisi.
Oblys ákimi álemdik deńgeıdegi jarystarda ózderiniń myqtylyǵyn tanytyp júrgen jastarǵa rızashylyǵyn bildirip, qoǵamdyq kólikti tartý etti.
Aımaq basshysy aýdanǵa sapary kezinde oblystyq №4 olımpıada rezerviniń mamandandyrylǵan balalar-jasóspirimder sport mektebiniń dırektory, «Shardara Armsport» sport klýbynyń negizin qalaýshy Arman Qarsybaevpen kezdesti. Ákim aldaǵy ýaqytta da klýbtan jańadan chempıondar shyǵa beretinine senim bildirdi.
Ómirzaq Shókeev bul kúni jańadan salynǵan álem chempıondary alleıasynyń jáne taekvondo, karate, jeńil atletıka zaldarynyń ashylý saltanatyna qatysty. Atalǵan alleıaǵa alǵashqy aǵashty otyrǵyzdy.
Sport klýbyna shaǵyn avtobýsty tartý etip, kóliktiń kiltin qol kúresinen álem chempıony Maǵjan Shamıevke tabystady.
Ómirzaq Shókeev shardaralyq chempıondarmen estelikke sýretke túsip, olarǵa aldaǵy ýaqytta Rýmynııada ótetin álem chempıonatynda jeńis tuǵyrynan kórinýge tilektes ekenin jetkizdi.
