Shókeev CITIC Group jáne Qytaı damý bankiniń ókilderimen birikken jobalardy talqylady

BEIJІŃ. QazAqparat - «Samuryq-Qazyna» AQ basqarma tóraǵasy, Qazaqstan-Qytaı Іskerlik Keńesiniń (QQІK) qazaqstandyq taraptan teń tóraǵasy Ómirzaq Shókeev «Bir beldeý, bir jol» halyqaralyq yntymaqtastyq forýmyna qatysý aıasynda birqatar kezdesýler ótkizdi, dep habarlaıdy «QazAqparat» HAA-nyń Qytaıdaǵy menshikti tilshisi. 

«Samuryq-Qazyna» qorynyń basshysy QQІK qytaılyq taraptan teń tóraǵasy, «CITIC Group» dırektorlar keńesiniń tóraǵasy Chjan Chjenmınmen kezdesti.

Ómirzaq Shókeev pen Chjan Chjenmın jańa jobalar aıasynda yntymaqtastyqtyń múmkindikteri týraly, sondaı-aq taıaý ýaqytta Astanada ótkiziletin Іskerlik Keńestiń tórtinshi otyrysynda kóteriletin máseleler týraly talqylady.

Ó.Shókeev Qytaıdyń memlekettik damý bankiniń (QMDB) tóraǵasy Hý Hýaıbanmen kezdesý ótkizip, yntymaqtastyqtyń qazirgi jáne bolashaqtaǵy baǵyttary boıynsha birqatar máselelerdi talqylady.

Qazirgi tańda qordyń mamandary QMDB-men birlesip qarjylandyrý kólemi 2 mlrd dollardy quraıtyn hımııa salasyndaǵy birqatar iri jobalardy júzege asyryp jatyr.

Eske salaıyq, 2017 jyldyń 14 mamyry kúni «Masal taý-baıytý kombınaty» JShS ókilderi Qytaıdyń China National Technical Import and Export Corporation (CNTIC) korporatsııasymen jáne Aqmola oblysyndaǵy Masal temir kendi ken orny bazasynda taý-ken metallýrgııalyq keshenniń qurylysyn qarastyratyn Qytaıdyń EKSIM-bankimen kelisimge qol qoıdy.