Shoqan jáne onyń zamany týraly ǵumyrnamalyq kitap jaryq kórdi
p; 24-i. QazAqparat /Marlan Jıembaı/ - Jýyrda Almatydaǵy «Qazaqstan» baspasynan «Ǵıbratty ǵumyr» serııasy boıynsha belgili jýrnalıst-zertteýshi, jazýshy Jarylqap Beısenbaıulynyń «Shoqan» atty kólemdi kitaby jaryq kórdi,
dep habarlaıdy QazAqparat.
Avtor Shoqan Ýálıhanovtyń ómirin kóp jyldan beri zerttep, qazaqtyń uly ǵalymynyń 1856 jyly jazǵan «Ystyqkól saparynyń kúndeligi» izimen qaıtalaı júrip ótken, ol ǵumyr keshken mekenderdi arnaıy aralap, buǵan deıin osy taqyrypqa arnalǵan «Shoqan izimen» (1977), «Jasyn-taǵdyr jarqyly» (1987) atty kitaptarymen oqyrman qaýymǵa tanymal qalamger.
Shoqandaı ardaqtymyzdyń keler jyly atalyp ótkeli otyrǵan 175 jyldyq mereıtoıy qarsańynda jaryq kórip otyrǵan jańa ǵumyrnamalyq týyndyda uly ǵulama men ol ómir súrgen zamanǵa qatysty, keıingi onjyldyqtarda ǵylymı aınalymǵa túsken tarıhı, muraǵattyq derekter keńinen paıdalanylyp, buryn beımálim bop kelgen kóptegen tustarǵa jańasha barlaý jasalynady. Sol kezeńdegi qazaqtyń belgili tulǵalary týraly tııanaqty maǵlumattar beriledi, kúsheıe túsken otarshyldyq qursaý, jańa jerlerdi baǵyndyrýǵa umtylǵan ımperııalyq obyr pıǵyldyń ártúrli qıturqylary ashyp kórsetiledi. Avtor mezgilinen oza týǵan Shoqannyń erek tulǵasyn, shyǵystaný áleminde quıryqty juldyzdaı aǵyp ótken ǵajaıyp ǵalymdyǵyn, óz dáýiriniń úzdik oıly aqylmandary men qalamgerlerin aıryqsha tánti etken oqshaý darynyn, qyzyǵy men qusalyǵy qatar ushyrasqan shytyrman taǵdyrly ǵumyryn sol dúrbeleń zaman demimen tyǵyz baılanystyra qarap tarqatady.
Kitap Mádenıet jáne aqparat mınıstrliginiń áleýmettik mańyzdy ádebıet tizimine engizilgen. Kólemi - 39 baspa tabaq.
QazAqparat anyqtamasy:
J. Beısenbaıuly - 1969-1990 jyldary «Jas Alash» gazetinde qyzmet istedi. 1990-1997 jyldary «Ana tili» gazetiniń tuńǵysh bas redaktory. 1997 jyldyń sońynan bastap Qazaq aqparat agenttigi (qazirgi «QazAqparat» ulttyq kompanııasy) Qazaq redaktsııasynyń bas redaktory. Oqyrman qaýymǵa ol joǵaryda atalyp ótken shyǵarmalardan basqa «Býyrqanǵan boıaýlar» (1981), «Ádep álemi» (1982), «Qazaq shejiresi» (1994), «Arǵy túrkter aqıqatynyń izimen» (2006) atty kitaptarymen de tanys.
