Shoqan Ýálıhanovtyń jan-jaqty qyryn ashatyn «Sónbes juldyz» atty semınar ótýde
ASTANA. QazAqparat - Búgin QR Ulttyq mýzeıinde ótip jatqan «Sónbes juldyz» atty taqyryptyq semınar stýdentter men oqýshylarǵa qazaqtyń ǵulama ǵalymy jáne aǵartýshy Shoqan Ýálıhanovtyń etnograf, folklorshy, qazaqtan shyqqan tuńǵysh kásipqoı sýretshi, saıahatshy, tipti, ekonomıst retindegi beınesin ashyp kórsetedi.
Bul týraly QazAqparat tilshisine Ulttyq mýzeıdiń Qazaqstan tarıhy bóliminiń ǵylymı qyzmetkeri Ǵalııa Aqpanbekova aıtyp berdi.
«Búgin Ulttyq mýzeıde qazaq halqynan shyqqan iri tulǵa Shoqan Shyńǵysuly Ýálıhanovtyń týǵanyna 180 jyl tolýyna oraı «Sónbes juldyz» atty taqyryptyq semınar ótýde. Bul semınarǵa negizinen Astana qalasyndaǵy stýdentter men oqýshylar, sondaı-aq mýzeıdiń «Qazaqstan tarıhı» bóliminiń qyzmetkerleri qatysyp jatyr. Jalpy, qazaq halqynan shyqqan iri tulǵalar baǵdarlamasynyń aıasynda ótip jatqan búgingi semınar barysynda Shoqandy tulǵa retinde jan-jaqty kórsetýge tyrysamyz. Shoqan Shyńǵysuly bir ǵana salada emes, jan-jaqty saladaǵy tulǵasyn kórsetkimiz keledi. Shoqan tek aǵartýshy, bolmasa geograf qana emes, Shoqan - etnograf, folklorshy, qazaqtan shyqqan tuńǵysh kásipqoı sýretshi, saıahatshy, tipti, ekonomıst. Shoqan Ýálıhanovtyń ár salada qosyp ketken eńbegi zor»,-deı kele Ǵ.Aqpanbekova mýzeıdegi Shoqanǵa arnalǵan ekspozıtsııa jaıly aıtyp berdi.
«Negizi, mýzeıdiń Qazaqstan tarıhy bóliminiń 13 ǵasyrdan 20 ǵasyrdyń basyna deıingi taqyryptyq turaqty ekspozııasynda Shoqanǵa arnalǵan arnaıy ekspozıtsııa bar. Ekspozıtsııaǵa 1956 jyly M.Áýezov atyndaǵy teatrda ataqty akter N.Jantórınniń Shoqan týraly spektaklde kıgen kıtelin qoıdyq, sondaı-aq Shoqannyń Qashqarııa, Quljaǵa saparynan jazǵan qoljazbalarynyń kóshirmelerin qostyq. Shoqan Ýálıhanovtyń orys dostary kóp bolǵan, orystyń ataqty ǵalymdary Shoqannyń ǵulama ekenin kezinde moıyndap ketken bolatyn. Sonyń bir dáleli - 1857 jyly Shoqan orys geografııalyq qoǵamyna múshelikke qosylǵan bolatyn, ekspozıtsııada osyny rastaıtyn qujattyń da kóshirmesi bar»,-dep tolyqtyrdy ol.
Ǵylymı qyzmetkerdiń habarlaýynsha, semınardyń birinshi bóliminde taqyrypty ashyp kórsetý úshin stýdentter men oqýshylarǵa dáris oqylady. Semınardyń ekinshi bóliminde QR Sýretshiler odaǵynyń múshesi Muhtar Baıbosynov balalarǵa Shoqan Ýálıhanovqa arnaǵan sýretterin, ǵalymnyń portretterin kórsetedi. Úshinshi bóliminde Qazaqstan tarıhy zalynyń tarıh bólimine ekskýrtsııa uıymdastyrylady.
