Shoqan Ýálıhanovtyń zertteýshilikten basqa qyrlaryn jurt bile bermeıdi - Nurmanov
TALDYQORǴAN. QazAqparat - Almaty oblysynyń Kerbulaq aýdanynda Shoqan Ýálıhanovtyń ómiri men shyǵarmashylyǵyna arnalǵan ǵylymı-teorııalyq konferentsııa ótti. Basqosýda áıgili zertteýshiniń ózge de qyrlary aıtyldy, dep habarlaıdy QazAqparat tilshisi.
Shoqannyń mol murasyn elge erekshe dáripteptep júrgen Shanhanaı aýylynda ornalasqan zertteýshi atyndaǵy memorıaldyq mýzeı. Onda kelgender saıahatshynyń saparlary jaıly qulaǵdar bolyp, jeke buıymdarymen tanysady. Dál osy mýzeıden eki shaqyrym jerde tulǵanyń beıiti bar. Kezekti saparynan aýyr syrqattanǵan jas ǵalym Mataı taýynyń eteginde sáýir aıynda qaıtys bolǵan.
Saıahatshynyń qysqa ǵumyryn bilip, shyǵarmashylyǵyn tanysamyn degen jurt aldymen beıit basyna baryp, quran baǵyshtaıdy. Jotadaǵy tereń oıǵa shomyp turǵan eskertkishine gúl shoqtaryn qoıady. Shoqantanýshy ǵalymdar Ýálıhanovtyń murasy mol ekendigin alǵa tartady. Al onyń zertteýshilikten basqa da qyrlaryn jurt áli kóp bile bermeıdi, deıdi professor Áben Nurmanov.
Onyń aıtýynsha Shoqan Ýálıhanov tárbıe men pedagogıkaǵa úles qosty. Pýblıtsıstıkalyq materıaldar jazý arqyly jýrnalıstik qyry tanyldy. Al Semeı men Tashkenttiń, Qytaı men Reseıdiń naryq baǵalaryn surastyryp, salystyryp, aqparat jınaýy onyń menedjerlik, marketologtyq qasıetterin kórsetedi.
Bıyl jazda úsh memleket aýmaǵyn qamtıtyn «Shoqan izimen» atty aýqymdy ekspedıtsııa jolǵa shyǵady. Shoqantanýshy ǵalymdar, respýblıkalyq BAQ ókilderi jáne blogerler Shoqannyń júrgen izimen júrip ótip, Qyrǵyzstan, Qytaıdyń Qajǵar qalasyna deıin jetip, sol jaqtan zertteýshi týraly tyń maǵlumattar men derekter jınap qaıtpaq.
