Shoqan Ýálıhanovtyń ómirine qatysty 50-ge jýyq tyń jańalyqtar qamtylǵan 10 tomdyq zertteýler jınaǵy jaryq kórdi
ALMATY. 15 sáýir. QazAqparat - BUU Adam quqyǵy komıtetiniń keńesshisi, «Beıbitshilik álemi» halyqaralyq qazaq shyǵarmashylyq birlestiginiń prezıdenti Áben (Ábdiáli) Nurmanovtyń Shoqan Ýálıhanov týraly «Shoqan sagasy» dep atalatyn 10 tomdyq (dekatom) zertteýler jınaǵy jaryq kórdi.
«Ákem ǵylym jolyna túsken kezimde Shoqan Ýálıhanovtyń ómirin, eńbegin muqııat zerttep, tek 40 jyldan keıin ǵana bul eńbegimdi jaryqqa shyǵarýǵa ótinish jasaǵan bolatyn. Endi mine osy áke amanaty júzege asyp otyr», - deıdi QR Jýrnalıster odaǵynyń múshesi, QR Bilim berý isiniń úzdigi, ekonomıka ǵylymynyń doktory Á.Nurmanov. Áben Aldabergenulynyń aıtýynsha, áıgili qazaq ǵalymnyń týyp-ósken, aralaǵan jerlerine jasalǵan ekspedıtsııa 1972 jyly bastalǵan. 1989 jylǵa deıin jalǵyz aralap kelgen kórinedi. Odan keıin 10 jyldyq úzilisten keıin 2000 jyldan bastap qaıta bastalǵan ekpedıtsııa quramyna ózge adamdar da tartylady. «Jumyla kótergen júk jeńil» degendeı, jınalǵan mol materıaldy jınaqqa aınaldyrý 7 aıdyń ishinde júzege asyp otyr.
«Shoqantanýshylardyń osy ýaqytqa deıin jaryq kórgen júzdegen eńbekterimen jáne ǵalymnyń ǵylymı murasyna arnalǵan 150-den astam ǵylymı-konferentsııalardyń materıaldarymen tanysyp shyqtym. Sodan keıin onyń ómirin eńbekteri arqyly ashýǵa tyrysyp, buǵan deıin belgisiz jáne kúmándi bolyp kelgen birqatar jáıttardyń jaı-japsaryn ashýǵa qol jetkizdim. Onda 50-ge jýyq tyń jańalyqtar ashylyp otyr», - deıdi Reseı, Qyrǵyzstan, Ázirbaıjan memleketteriniń 8 joǵary oqý ornynyń Qurmetti professory, Reseı pedagogıka akademııasynyń akademıgi, Reseı psıhologııa akademııasynyń korrespondent-múshesi Á.Nurmanov.
