Shoqan Ýálıhanovtyń izimen ekspedıtsııaǵa shyqqan top Semeıge jetti
TALDYQORǴAN. QazAqparat - Áıgili saıahatshy, etnograf-ǵalym Shoqan Ýálıhanovtyń Qashǵar eline saparlaǵanyna 160 jyl tolýyna oraı Taldyqorǵannan shyqqan ekspedıtsııalyq top Semeı qalasyna aıaldady, dep habarlaıdy QazAqparat tilshisi.
Shoqan Ýálıhanovtyń izimen júrip ótý, jańa derekterdi anyqtaý jáne nasıhattaý maqsatynda qurylǵan «Shoqjuldyz izimen» atty ekspedıtsııalyq top birneshe kún buryn Taldyqorǵan qalasynan saparǵa shyqqan bolatyn.
Semeı qalasyna aıaldaǵan ekspedıtsııa Shoqan Ýálıhanov týraly tyń derekter jınap, ólketanýshylardyń maǵlumattaryna qanyq boldy. Semeı shahary Shoqan Ýálıhanovtyń ómirinde erekshe oryn alady. Zertteýshi óz kúndeliginde 1858 jyldyń 28 maýsymynda osy jerde Semeı kópesi Musabaıdyń kerýenine qosylǵanyn atap ótedi. Sondaı-aq, Shoqan Ýálıhanov Semeıde óziniń dosy Fedor Dostoevskıımen de birneshe ret kezdesken. Ekspedıtsııa músheleri orys jazýshysynyń mýzeıinde bolyp, shoqtyǵy bıik Shoqanǵa qatysty biraz málimet aldy. Shoqan Ýálıhanov pen Dostoevskıı dál osy ǵımaratta uzaq áńgimelesip, estelik sýretke de túsken. 
«Fedor Mıhaılovıch Dostoevskıımen aralasa otyryp, ótken ǵasyrdaǵy, ótken zamandardaǵy saıahatshylardyń ómirin, ıaǵnı olardyń isterin, jasaǵan jańalyqtaryn estip biledi», - dedi «Shoqjuldyz izimen» ekspedıtsııasynyń múshesi, professor Muratbek Imanǵazınov.
Sapar barysynda ekspedıtsııa músheleri qalanyń tarıhymen de tanysyp, Abaı Qunanbaevtyń, Alash arystary men Muhtar Áýezovtyń mýzeılerine at basyn burdy. Tarıhy tereń, tulǵalary eren shahardyń rýhanı dúnıesine tánti boldy. «Shoqjuldyz izimen» ekspedıtsııasy endi Aıagóz qalasyna bet alady.
