Shoqan Ýálıhanov ıahtasy óziniń saparyn qaıta jalǵastyrýǵa daıyn- Dmıtrıı Petrýhın
ALMATY. 18 shilde. QazAqparat /Erlik Erjanuly/ - Shoqan Ýálıhanov ıahtasy tamyz aıynda teńizdegi saıahatyn qaıta jalǵastyrady. Bul keshe Balqash kóliniń jaǵasynda ótken baıkerlerdiń 5-shi festıvali kezinde aıtyldy.
"Shoqan Ýálıhanov ıahtasyn jóndeý jumystaryn qarjylandyrý júzege asty. Qazir ol Ekvadorda teńizdegi saıahatyn jalǵastyrý úshin júzý saparyna daıyn tur", - deıdi joba jetekshisi Dmıtrıı Petrýhın. Onyń aıtýynsha, buǵan deıin Shoqan Ýálıhanov ıahtasynyń álemdik saıahatyna qarjylandyrý máselesi tusaý bolyp turǵan. Endi qarjylandyrý máselesi sheshilgenimen, ıahta óziniń saparyn táýelsizdiktiń 20 jyldyǵyna deıin aıaqtaı almaıtyny málim bolyp otyr. Tamyz aıynda ol Panama arnasy arqyly Ekvadorǵa jetkizilmek. Qazir ol Antıgýa aralynda tur.
Jalpy Ortalyq Azııa elderinde tuńǵysh ret jer sharyn aınalyp shyǵatyn "Terra Vita" dep atalatyn bul teńiz ekspedıtsııasyn Ortalyq Azııa geografııalyq qoǵamy daıyndaǵan bolatyn. "Biz álemdi ashamyz - Álem bizge ashylady" degen urandy ustanǵan bul saıahattyń basty maqsaty - Qazaqstandy dúnıe júzine tanystyryp, týrızmdi nasıhattaý bolatyn. Ol teńizdegi óz saparyn 2007 jyly Aqtaý teńiz aılaǵynan bastady. Bastapqyda ıahta Volga-Don basseıni jáne Qara teńiz ben Jerorta teńizi arqyly Atlantıkaǵa shyǵyp 1 jylda dúnıe júzin aınalyp shyǵady dep josparlanǵan bolatyn. Qarjy tapshylyǵyna baılanysty alaıda ol óz saparyn 2 jylǵa toqtatýǵa májbúr boldy.
