Shoqan Ýálıhanov pen Maǵjan Jumabaevtyń jeke zattary kórmege qoıyldy
PETROPAVL. QazAqparat - Soltústik Qazaqstan oblystyq tarıhı-ólketaný murajaıynda aýdandyq memlekettik mýzeılerdiń qorynan jınalǵan eksponattardan «Tarıhı murany saqtaı otyryp» atty kórme uıymdastyryldy, dep habarlaıdy «QazAqparat» HAA.
Kórmege eksponattaryn 8 aýdan qoıǵan. Memorıaldyq mýzeıler tanymal soltústikqazaqstandyq azamattardyń ómiri men qyzmeti týraly materıaldardy alyp kelgen. Ǵaryshker Aleksandr Vıktorenkonyń kıimi, Ǵabıt Músirepovtyń kózildirigi, Shýhovtyń jazý quraldary mýzeıge qoıylǵan zattardyń tek bir parasy ǵana.
Ekspozıtsııada Maǵjan Jumabaev pen onyń otbasynyń jeke zattary qoıylǵan. Olardyń arasynda samaýryn, kámpıt salǵysh ydys, jaınamaz, arab tilindegi Quran kitaby, 1923 jyly Tashkentte shyǵarylǵan óleńder jınaǵy sııaqty dúnıeler bar. Kórmede aqynnyń ózgelerge beımálim bolyp kelgen portretin kórýge bolady.
Esil aýdany Keńes Odaǵynyń 6 batyry, Uly Otan soǵysy ardagerleriniń Otany. Osyǵan qaraı kórmede maqtaý qaǵazdary, gımnasterka, maıdannan jazylǵan úshburyshty hattar men ózge de áskerı salaǵa baılanysty zattar qoıylǵan.
Syrymbettik Sh.Ýálıhanov tarıhı-etnografııalyq mýzeıiniń ókilderi kórmege áıgili, tarıhshy, etnograftyń jeke zattaryn alyp kelgen. Sondaı-aq ǵalymnyń 1850 jylǵy jol sómkesi de bar.
«Ásirese munda Shoqan Ýálıhanovtyń inisiniń pildińsúıegin qoldana otyryp jasaǵan sandyǵy erekshe qyzyqtyrady. Sonymen qatar saıahatshynyń týǵandaryna Peterbýrgten alyp kelip bergen 1812 jylǵy karamel qorapshasy qoıylǵan da kórmede tur»,-dedi mýzeıdiń qor bóliminiń meńgerýshisi Natalıa Bondarenko.
Aýdandyq ólketaný mýzeıleriniń qorlaryndaǵy eksponattardan daıyndalǵan kórme alǵash ret uıymdastyrylýda. Kórme sáýirdiń orta tusyna deıin jalǵasady.
