Shógen oıyndarynan ekinshi Qazaqstan chempıonaty aıaqtaldy
ALMATY. QazAqparat - Tamyzdyń 11-i men 13-i aralyǵynda Almaty oblysynyń Talǵar aýdanyndaǵy at sporty kesheninde ótken shógennen ІІ Qazaqstan chempıonaty óz máresine jetti, dep habarlaıdy QazAqparat tilshisi Almaty ákimdiginiń aqparattyq-sporttyq habyna silteme jasaı otyryp.
Úsh kúnge sozylǵan el birinshiliginde alty komanda baq synady.
Olar: Ońtústik Qazaqstan oblysy shógen federatsııasynyń komandasy, Aqmola oblysy shógen federatsııasynyń komandasy, Aqqııa shógen klýby, Áýlıe ata shógen klýby, «Astana polo club» pen «Almaty polo club» komandalary.
Osymen ekinshi márte uıymdastyrylǵan jarysta úshinshi oryn úshin talasta Áýlıe ata shógen klýby men Aqmola oblysy shógen federatsııasynyń komandalary ózara myqtyny anyqtady. Tartysty ótken kezdesýde 2-1 esebimen byltyrǵy chempıondar Áýlıe ata shógen klýby jeńiske jetti.
Al sheshý synda «Astana polo club» pen «Almaty polo club» komandalary chempıondyq ataqqa talasty.
Birneshe halyqaralyq týrnırlerdiń jeńimpazdary qos komandada jınalǵandardyń delebesin qozdyrdy.
Qorytyndy esep 6-4. Jeńis «Astana polo club» komandasynyń paıdasyna sheshildi.
Sondaı-aq, chempıonattyń «úzdik oıynshy» nomınatsııasy boıynsha taǵaıyndalǵan júldesi «Almaty polo club» komandasynyń kapıtany Qýanysh Musabekovke buıyrdy.
Al, «úzdik polo ponı» bolyp, «Maýsym» atty sáıgúlik tanyldy. Tıisinshe Aqqııa shógen klýby 5 orynǵa ıe bolsa, Ońtústik Qazaqstan oblysy shógen federatsısynyń komandasy 6 orynnan kórindi.
Saıystyń júlde qory: 2 mıllıon teńge boldy, birinshi orynǵa 1 mıllıon teńge bolsa, ekinshi orynǵa 600 myń, úshinshi orynǵa 400 myń teńge berildi.
