ShOB-tan túsetin QQS-ty aýyldyq okrýgter bıýdjetine berý orynsyz – Úkimet basshysy

ASTANA. KAZINFORM – Shaǵyn jáne orta bıznesten túsetin qosylǵan qun salyǵyn aýyldyq okrýgterdiń bıýdjetine berý orynsyz. Bul jaıynda Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.

- 2020-2025 jyldar aralyǵynda shaǵyn jáne orta bıznes sýbektilerinen túsetin korporatıvtik tabys salyǵyn (budan ári – ShOB-tan túsetin KTS) qosa alǵanda, salyqtyq jáne salyqtyq emes 6 tólem respýblıkalyq bıýdjetten jergilikti bıýdjetter deńgeıine berildi. Atalǵan kezeńde jergilikti bıýdjetterge ShOB-tan shamamen 6761,5 mlrd teńge KTS tústi. Sonymen qatar ShOB-tan túsetin korporoatıvtik tabys salyǵynyń bir bóligin aýyldyq okrýgter deńgeıine berý ákimder apparattarynyń kiristeriniń naqty shyǵystarǵa suranysynan edáýir asyp ketýine ákep soǵady jáne olardyń fýnktsııalary men ókilettikterin keńeıtýdi qajet etedi,- dedi Úkimet basshysy.

Onyń paıymynsha, dál qazirgi kezde aýyldyq okrýgter ákimderi apparattarynyń mundaı mindettemelerdi tıimdi oryndaýy úshin jetkilikti ınstıtýtsıonaldyq jáne kadrlyq ázirligi joq.

- Shaǵyn jáne orta bıznes sýbektilerinen túsetin qosylǵan qun salyǵyn berýge qatysty, QQS-ty qaıtarýǵa baılanysty eleýli fıskaldyq táýekelderdiń bar ekenin atap ótemiz. Bul jekelegen óńirler boıynsha teris saldoǵa ákelýi múmkin jáne Bıýdjet kodeksinde bekitilgen bıýdjetaralyq qatynastar qaǵıdattaryna qaıshy keledi. Osyǵan baılanysty shaǵyn jáne orta bıznes sýbektilerinen túsetin ishki óndiris taýarlaryna salynatyn QQS-ny berý týraly usynys orynsyz dep sanaımyz, - dedi Oljas Bektenov.

Buǵan deıin aýyldyq okrýgterdiń bıýdjetine jekelegen salyq túsimderin berý máselesi pysyqtalyp jatqanyn jazǵan edik.