ShOB sýbektilerin jeńildikpen qarjylandyrý baǵdarlamasy ázirlenip jatyr
ASTANA. KAZINFORM – Shaǵyn jáne orta bıznes sýbektilerin jeńildikpen qarjylandyrýdyń jańa baǵdarlamasy ázirlenip jatyr. Bul týraly Ulttyq ekonomıka mınıstrligi Kásipkerlikti memlekettik qoldaý jáne qorǵaý departamentiniń dırektory Daryn Ábdýáli aıtty.
- Naryqtyq emes tetikterden, onyń ishinde sýbsıdııalaýdan kepildik berýge kezeń-kezeńimen kóshý boıynsha Úkimet júrgizip otyrǵan saıasat aıasynda Kásipkerlikti qoldaýdyń keshendi baǵdarlamasyna portfeldik sýbsıdııalaý tetigin engizýdi, sondaı-aq «Damý» qory bazasynda kepildik qorlary arqyly kepildikter berýdi kózdeıtin túzetýler engizilip jatyr. Negizgi jańalyq – sheshim qabyldaý jónindegi ókilettikterdi ýákiletti operatordyń qatysýynsyz tikeleı ekinshi deńgeıdegi bankterge berý. Bul ótinimderdi qaraýdy jedeldetýge, qarjylandyrýdyń ataýlylyǵyn jáne kásipkerlik bastamalardy iske asyrýdyń jedeldigin arttyrýǵa múmkindik beredi, - dedi departament basshysy Ortalyq kommýnıkatsııalar qyzmetindegi brıfıngte.
Onyń sózine qaraǵanda, «Damý» qorynyń bazasynda kepildik qorlaryn qurý boıynsha negizgi jumys aıaqtaldy. Tetikter iri ınvestıtsııalyq jobalardy 7 mlrd teńgeden bastap, shaǵyn jáne orta bıznesti 7 mlrd teńgege deıin qamtıdy. Bul ekonomıkanyń naqty sektoryn kredıtteýge banktik ótimdilikti tartýǵa yqpal etedi.
- Budan basqa, ekonomıkalyq ósýdi jandandyrý maqsatynda jyldyq 12,6 paıyz mólsherlememen shaǵyn jáne orta bıznes sýbektilerin jeńildikpen qarjylandyrýdyń jańa baǵdarlamasy ázirlenip jatyr. Kredıtter qosa qarjylandyrý sharttarymen ekinshi deńgeıdegi bankter arqyly beriledi. Bir qaryz alýshyǵa nemese bir-birimen baılanysty qaryz alýshylar tobyna eń joǵary lımıt 7 mlrd teńgege deıin bolady, - dedi Darhan Ábdýáli.
Aıta keteıik, byltyr Qazaqstanda 1 mln-nan asa áıel shaǵyn jáne orta bıznesti basqarǵan. Bul shaǵyn jáne orta kásipkerlik (ShOK) sýbektileriniń jalpy sanynyń 48,1 paıyzy.