ShOB ósimi 20%-dan asty: bıznesti tekserý azaıyp, qoldaý kúsheıdi
ASTANA. KAZINFORM – Qazaqstanda memlekettik baqylaý júıesin reformalaý men bıznesti qoldaý sharalary shaǵyn jáne orta kásipkerliktiń damýyna oń áserin tıgizdi. Bıylǵy birinshi jartyjyldyqtyń qorytyndysy boıynsha elimizde tirkelgen kásipkerlik sýbektileriniń sany 2,9 mln-ǵa jetti.
Memlekettik kirister komıtetiniń málimetine sáıkes, bul kórsetkish jyl basymen salystyrǵanda 499 myńǵa nemese 20,4%-ǵa artqan. Ásirese taý-ken óndirý ónerkásibinde (+2,9%), qurylys jáne aýyl sharýashylyǵy (+2,5%), sondaı-aq aqparat jáne baılanys (+2,4%) salalarynda shaǵyn zańdy tulǵalardyń sany kóbeıgen.
2025 jyldyń qorytyndysynda shaǵyn jáne orta bıznestiń jalpy ishki ónimdegi úlesi 40,9%-ǵa jetse, óndirilgen ónim kólemi 104,7 trln teńgeni qurap, bir jylda 27,8%-ǵa ósti.
– Memleket baqylaý júıesine túbegeıli ózgeris engizip, jazalaý tásilinen aldyn alý jáne profılaktıka qaǵıdatyna kóshti. Nátıjesinde ótken jyly bıznesti tekserý sany 8,6%-ǵa qysqardy. Zańnamadan 10 myńnan astam artyq talap alynyp tastalyp, jańa talaptardy engizýde «1 in 2 out» qaǵıdaty qoldanyla bastady, – delingen Úkimettiń aqparatynda.
Sonymen qatar bıznestiń eseptiliginiń 49%-y ońtaılandyrylyp, kásipkerlerdiń memlekettik qyzmetterdi jedel alýyna arnalǵan «eGov Business» tsıfrlyq qosymshasy iske qosyldy.
Kásipkerlerdi qarjylaı qoldaý sharalary da keńeıtildi. Ótken jyly 1,6 trln teńge somasyna 9,5 myńǵa jýyq joba jeńildetilgen qarjylandyrý aldy. Qazir «Órleý» baǵdarlamasy arqyly kásipkerlerge 10 jylǵa deıingi merzimge 12,6%-ben nesıe berilýde. Bıylǵy 1 maýsymdaǵy jaǵdaı boıynsha 91 qaryz alýshyǵa jalpy kólemi 18,4 mlrd teńge qarjy bólingen.
Óńdeý ónerkásibi jobalaryn qoldaý úshin óńirlerde 13,2%-dyq «Іsker aımaq» baǵdarlamasy iske qosyldy. Sonymen birge «Damý» qorynyń bazasynda eki jańa kepildik qory qurylyp, óńdeý ónerkásibi, kólik, logıstıka jáne bilim berý salalaryndaǵy jobalardy qoldaý bastaldy.
– Bıylǵy 1 maýsymdaǵy jaǵdaı boıynsha kepildik qory arqyly jalpy quny 189,9 mlrd teńgeni quraıtyn 998 joba qoldaý tapty. Al Kepildik qory-2 aıasynda jalpy somasy 442,4 mlrd teńgeni quraıtyn alty iri joba maquldandy. Qarajatty bólýdi baqylaý úderisi tolyqtaı «Baqylauda» tsıfrlyq júıesi arqyly avtomattandyrylǵan, – dep atap ótti Úkimet.
Memlekettik satyp alý júıesi de jańǵyrtyldy. Jańa zańnyń arqasynda rásimderdiń merzimi 30 jumys kúninen 10 jumys kúnine deıin qysqaryp, bir kózden satyp alý úlesi 23%-ǵa deıin tómendedi. Qazaqstandyq óndirýshiler úshin 50% kóleminde mindetti avans tóleý, kelisimshartty qamtamasyz etý talaptarynan bosatý jáne turaqsyzdyq aıybyn 3%-ǵa deıin tómendetý tetikteri engizildi.
Bıylǵy alty aıda memlekettik satyp alý kólemi 7,7 trln teńgeni qurady. Onyń ishinde otandyq taýar óndirýshilermen jalpy somasy 85,2 mlrd teńgege 61 532 kelisimshart jasalǵan.
Aıta keteıik, Qazaqstandaǵy bıznes sýbektileriniń jartysyna jýyǵyn áıelder basqarady.
