ShOB «qarapaıym zattar ekonomıkasy» baǵdarlamasyna belsendi qatysýy qajet - Úkimet basshysy
"Kásipkerlikti damytý Úkimet jumysynyń asa mańyzdy baǵyttarynyń biri. Elbasy shaǵyn jáne orta bıznestiń rólin kúsheıtip, onyń el ekonomıkasyndaǵy úlesin 2025 jylǵa qaraı 35 paıyzǵa deıin jetkizý mindetin qoıdy. Qazirgi tańda baǵdarlama bıznesti damytý úshin qajetti tıimdi quraldardyń birine aınaldy. Baǵdarlamany iske asyrýǵa aǵymdaǵy jyly 71,8 mlrd teńge bólinedi", - dedi Úkimet basshysy.
Onyń aıtýynsha, baǵdarlamany júzege asyrý barysynda shaǵyn jáne orta kásipkerlikti damytýda Almaty men Nur-Sultan qalalary, Atyraý jáne Qostanaı oblystary jaqsy kórsetkishterge jetip, oń damý qarqynyn qamtamasyz etti. Degenmen artta qalyp qoıǵan óńirler de bar. Olar osy baǵyttarda jumysty jandandyrýy qajet.
"Shaǵyn jáne orta bıznes "qarapaıym zattar ekonomıkasy" baǵdarlamasyna belsendi qatysýy qajet. Baǵdarlama boıynsha osy maqsattarǵa 600 mlrd teńge bólingen. Búgingi tańda kásipkerler 310,4 mlrd teńgege 350 ótinim bergen. Olarmen jumys júrgizilýde. Sondaı-aq ekinshi deńgeıli bankter qarap jatyr. Osy jobalarǵa bólinetin qarajatty ıgerý qarqynyn ósirý kerek jáne baqylaýǵa alý qajet", - dedi Premer-Mınıstr.
Osyǵan baılanysty Asqar Mamın Indýstrııa jáne ınfraqurylymdyq damý mınıstrligine "Atameken" UKP jáne memlekettik organdarmen birge jobalyq ofıstiń jumysyn jandandyrýdy tapsyrdy.
"Ulttyq ekonomıka mınıstrligi "qarapaıym zattar ekonomıkasy" aıasynda basym jobalarǵa kepildik berý tetigin bekitý jáne aınalym kapıtalyna kredıt berý mólsherinde qarjylandyrýdy kózdeıtin Úkimet qaýlysy jobasyn engizsin. Ákimdikter baǵdarlama talaptaryna saı keletin jańa jobalardy tartý boıynsha qajetti aqparattyq jumysty kúsheıtýi kerek",- dedi Úkimet basshysy.
