Іshimdikten bas tartý – halyqtyń sanaly tańdaýy, ol nátıje berip otyr – Bas prokýror

ASTANA. KAZINFORM – QR Bas prokýrory Berik Asylov óziniń H áleýmettik jelisindegi paraqshasynda elimizdiń kóptegen aımaqtarynda turǵyndardyń ishimdikten bas tartýyna baılanysty jazba jarııalap, óziniń pkirin bildirdi.

- Azamattar jaýapkershilikti óz moınyna alǵanda — shynaıylyq ózgeredi. Elimiz boıynsha júzdegen aýyldar óz erkimen spırtti ishimdikterdi satýdan bas tartýda,- dep jazdy ol.

Bas prokýrordyń pikirinshe, bul — qarapaıym halyqtyń sanaly tańdaýy. Tártip, densaýlyq jáne balalarynyń bolashaǵy úshin jasalǵan sheshim. Máselen, Mańǵystaý oblysynyń Mańǵystaý aýdanyndaǵy bir aýylda turǵyndar ishimdikti satýdan óz erkimen bas tartyp, bul týraly beınerolıkti áleýmettik jelilerde jarııalady. Osyndaı mysaldar Aqmola, Jambyl, Qaraǵandy, Atyraý jáne basqa da oblystarda kezdesedi.

- Iá, bul eldegi barlyq aýyl sanyn eskersek, teńizge tamǵan tamshydaı kórinýi múmkin. Biraq bastysy — jaǵdaıdyń oń serpini bar. Mundaı eldi mekender sany artyp keledi. Adamdar senim men turaqtylyqty, tynyshtyqty joǵary baǵalap, bir-birine úlgi bola bastady, - deıdi Berik Asylov.

Sondaı-aq ol bastamanyń aýyl aqsaqaldary men Qoǵamdyq keńesterden shyǵyp, prokýratýra, polıtsııa jáne jergilikti ákimdikterdiń tarapynan úılestirý, aldyn alý jáne qaýipsizdik qamtamasyz etilgenin atap ótti.

- Aýyl kásipkerleri erekshe alǵysqa laıyq. Jerlesteriniń únin estip, olar dúken sórelerinen ishimdikti óz erkimen alyp tastady. Kúmándanǵanmen, tabystary azaıǵan joq. Kerisinshe, aýyl turǵyndary ishimdiktiń ornyna balalarǵa paıdaly azyq-túlikterdi jıi satyp ala bastady. Nátıjeler ózdiginen kórinip tur: keıbir aýyldarda qylmys múlde joıyldy, turmystyq janjaldar toqtady, jastar sport pen sanaly ómir saltyn tańdaı bastady. Bul — «Zań jáne Tártip» qaǵıdatynyń ómirdegi naqty kórinisi. Tártip qorqynyshpen emes — senimmen, jaza arqyly emes — sanaly tańdaýmen ornaıdy. «Zań men Tártip — kemel demokratııanyń irgetasy ári quqyqtyq memlekettiń negizi», – dep Memleket basshysy atap ótken edi. Biz bolashaqqa degen qamqorlyq, qoǵamdyq kelisim jáne zańǵa qurmetke negizdelgen árbir bastamany qoldaımyz, - dedi vedomstvo basshysy.

Sóz sońynda ol resmı statıstıka boıynsha bıylǵy alǵashqy úsh aıda alkogoldik mas kúıinde jasalǵan qylmystar sany azaıǵanyn málim etti.

Osyǵan deıin Túrkistan oblysynda ishimdikten bas tartqan aýyldar sany 60-tan asqanyn jazdyq.  

Sondaı-aq Aqtóbe oblysynda ishimdikten bas tartqan 33 aýyl bar ekeni jazyldy.