Shildeniń ekinshi jeksenbisi - Balyq sharýashylyǵy qyzmetkerleri kúni
ASTANA. KAZINFORM — Balyq sharýashylyǵy negizinen aýyldyq jerlerde óndiris kóleminiń, halyqtyń tabysy men jumyspen qamtylýynyń ósýi úshin áleýeti joǵary Qazaqstan ekonomıkasynyń mańyzdy sektorlarynyń biri bolyp tabylady.
Memleket basshysynyń tapsyrmasy boıynsha balyq salasyn damytýǵa erekshe kóńil bólinedi. Balyq ósirý perspektıvaly baǵyt bolyp tabylady, óıtkeni salany damytý úshin Kaspıı jáne Aral teńizderiniń, Balqash jáne Zaısan kólderiniń, Alakól kólder júıesiniń, Buqtyrma, Qapshaǵaı, Shardara sý qoımalarynyń, sondaı-aq basqa da sý aıdyndarynyń aıtarlyqtaı sý resýrstary bar.
Búgingi tańda balyq ósirý salasynda bıznestiń iskerlik belsendiliginiń ósýi baıqalady.
Máselen, 2021 jylmen salystyrǵanda balyq ósirý sharýashylyqtarynyń sany 2023 jyly 2,5 eseden artyp, 502-ge jetti. Bul rette balyq ósirý kólemi 7-den 17 myń tonnaǵa deıin ulǵaıdy.
Kásiptik balyq aýlaý negizinen Atyraý, Almaty, Shyǵys Qazaqstan, Qyzylorda jáne Túrkistan oblystarynda júrgiziledi.
Eldiń tabıǵı sý aıdyndarynda jyl saıyn shamamen 45-50 myń tonna balyq aýlanady jáne bul kórsetkish turaqty deńgeıde. Óıtkeni júıeli negizde balyq resýrstary men basqa da sý janýarlaryn saqtaý boıynsha sharalar qabyldanýda. Eń aldymen, bul brakonerlikpen kúrestiń kúsheıýi.
Qorǵaý is-sharalarymen qatar jyl saıyn tabıǵı sý aıdyndarynyń kóktemgi jáne kúzgi kezeńderde balyqtar men olardyń shabaqtaryn qutqarý arqyly balyq resýrstaryn molaıtý, qys mezgilinde jappaı qyrylýǵa qarsy is-sharalar júrgizý, sondaı-aq memlekettik tapsyrys jáne balyq sharýashylyǵy sýbektilerin damytý josparlary sheńberinde baǵaly balyq túrlerimen qamtamasyz etý sharalary qabyldanady.
Máselen, 2023 jyly memlekettik balyq ósirý kásiporyndary men jeke balyq ósirý sharýashylyqtary memlekettik tapsyrys sheńberinde baǵaly balyq túrleriniń 100 mln.dana shabaqtaryn ósirdi, bul 2021 jylmen salystyrǵanda 25% - ǵa artyq.
Bul rette, balyq sharýashylyǵy sýbektileri 2023 jyly bekitilgen sý qoımalaryna baǵaly balyq túrleri shabaqtarynyń 162,3 mln.danasyn shyǵardy, bul 2021 jylmen salystyrǵanda 29% - ǵa artyq.
Sonymen qatar, 2023 jyly álemniń 21 eline 25 myń tonnaǵa jýyq balyq ónimderiniń 50-den astam túri eksporttaldy. Eń iri tutynýshylar — Reseı, Germanııa, Nıderlandy, Lıtva jáne Qytaı.
Árıne, sala qyzmetkerleri úlken úles qosýda.
Qazaqstanda balyq sharýashylyǵy qyzmetkerleriniń kúni resmı túrde 2017 jyldan beri shildeniń ekinshi jeksenbisinde atap ótiledi.
Kásibı mereke sala qyzmetkerleriniń qajyrly eńbeginiń mańyzdylyǵyn atap ótýge arnalǵan.
Ekonomıkanyń osy sektoryndaǵy memlekettik saıasatty ekologııa jáne tabıǵı resýrstar mınıstrliginiń júıesinde 2021 jyly qaıta qurylǵan. 2024 jylǵy qańtarda QR Aýyl sharýashylyǵy mınıstrliginiń qaramaǵyna berildi jáne osy saladaǵy qyzmetti retteıtin jáne baqylaıtyn negizgi organ bolyp Balyq sharýashylyǵy komıteti qala beredi.
Balyq sharýashylyǵy komıtetinde 8 oblysaralyq basseındik balyq sharýashylyǵy ınspektsııasy, balyqtardyń baǵaly túrleriniń shabaqtaryn jasandy ósirý boıynsha 3 memlekettik balyq ósirý kásiporny jáne mamandandyrylǵan ǵylymı uıym bar.
Mereke qarsańynda balyq sharýashylyǵy komıteti jáne onyń vedomstvolyq baǵynysty bólimsheleri óńirlerde ardagerlerge qurmet kórsetý jáne salanyń erekshe kózge túsken eńbekkerlerin Aýyl sharýashylyǵy mınıstriniń vedomstvolyq medaldarymen jáne Qurmet gramotalarymen marapattaýdy uıymdastyrdy.
