Shildeniń 10 kúninde Qazaqstanda 121 keliden astam sıntetıkalyq esirtki tárkilendi
ASTANA. KAZINFORM – Іshki ister mınıstrligi «Qarasora – 2026» jedel-profılaktıkalyq is-sharasy aıasynda esirtkiniń zańsyz aınalymyna qarsy kúresti jalǵastyryp jatyr, dep habarlaıdy Kazinform Polisia.kz-ke silteme jasap.
Astana qalasynda polıtseıler 26 jastaǵy turǵyndy ustady. Onyń jeke tintýi men jalǵa alǵan páterin tekserý barysynda satýǵa daıyndalǵan 245 gramm a-PVP sıntetıkalyq esirtkisi salynǵan 227 orama tárkilendi.
ІІM málimetinshe, shilde aıynyń alǵashqy onkúndiginde Esirtki qylmysyna qarsy is-qımyl komıteti aýmaqtyq bólimshelermen birlesip 187 esirtki quqyq buzýshylyǵyn anyqtady. Onyń ishinde 86 qylmystyq teris qylyq pen 101 qylmys tirkelgen.
– On kún ishinde esirtkini ótkizýdiń 46, asa iri mólsherde saqtaýdyń 4, quramynda esirtkisi bar ósimdikterdi zańsyz egýdiń 40 faktisiniń joly kesildi. Sondaı-aq esirtki kontrabandasynyń 4 deregi anyqtaldy. Zańsyz aınalymnan 266 keli prekýrsor men 760 keli esirtki, onyń ishinde 121 keliden astam sıntetıkalyq esirtki tárkilendi, – dedi ІІM Esirtki qylmysyna qarsy is-qımyl komıteti tóraǵasynyń orynbasary Eldar Ábdikenov.
Vedomstvo jazǵy demalys kezinde oqýshylar men stýdentter arasynda profılaktıkalyq jumystarǵa erekshe nazar aýdarylyp jatqanyn atap ótti.
– Alǵashqy onkúndikte 6 myńǵa jýyq jasóspirim men jasty qamtyǵan 145 profılaktıkalyq is-shara uıymdastyryldy. Іshki ister mınıstrligi azamattardyń ómiri men densaýlyǵyn qorǵaý, sondaı-aq jastardyń esirtki ortasyna tartylýynyń aldyn alý baǵytyndaǵy jumysty jalǵastyrady, – dedi Eldar Ábdikenov.
Aıta keteıik, Almatyda esirtkige qarsy jańa mýral paıda boldy.
