Shildeden bastap «Astana-Býrabaı» baǵytynda jańa elektr poıyzy qatynaıdy

ASTANA. KAZINFORM — Jyljymaly quramdy jańartý baǵdarlamasy aıasynda «Jolaýshylar tasymaly» AQ birinshi, ekinshi jáne úshinshi klasty jańa elektr poıyzyn paıdalanýǵa berýdi josparlap otyr. Bul týraly «Qazaqstan temir joly» UK» AQ baspasóz qyzmeti málim etti.

— Quram Astana — Býrabaı kýrorty baǵdary boıynsha júretin bolady. Poıyz alty vagonnan turady jáne 374 orynǵa arnalǵan. Ol barlyq qajetti tehnıkalyq tekserýlerden ótti. Qazirgi ýaqytta Keden odaǵynyń tehnıkalyq reglamentiniń talaptaryna sáıkes qujattamany resimdeý aıaqtalady, — delingen habarlamada.

Tasymaldaýshy kompanııanyń dereginshe, poıyz dızaınynda qol jetimdilik pen ınklıýzıvtilik máselelerine erekshe nazar aýdarylǵan. Ár klasta bıodárethanalar, sonyń ishinde múmkindigi shekteýli jolaýshylarǵa arnalǵan arnaıy beıindelgen kabınalar qarastyrylǵan. Múmkindigi shekteýli jandarǵa yńǵaıly bolý úshin platformalyq kótergishter qarastyrylǵan.

— Avtomatty shyǵarylatyn aıaq tirekteri, ásirese egde jastaǵy jolaýshylar men balalary bar otbasylar úshin yńǵaıly otyrǵyzý men túsirýdi qamtamasyz etedi. Poıyzdaǵy árbir oryn mobıldi qurylǵylardy zarıadtaýǵa arnalǵan USB qosqyshymen jabdyqtalǵan. Sonymen qatar, quramda salqyn sýsyndar men jeńil taǵamdar qarastyrylǵan, — dep jazdy ulttyq tasymaldaýshy kompanııadan.

Buǵan deıin «Jolaýshylar tasymaly» AQ № 6857/6858 «Astana — Qaraǵandy» marshrýtynda Somfort+ formatyndaǵy elektr poıyzyn iske qosqan bolatyn. Alty vagondyq quram 576 jolaýshyǵa arnalǵan.

Aıta keteıik, Alakólge jazda 240 myń jolaýshy temirjol kóligimen tasymaldanady.