Shildeden balany qabyldaýshy kásibı otbasy engiziledi
ASTANA. KAZINFORM – 2025 jyldyń shildesinen bastap otbasylyq ornalastyrýdyń jańa nysany – balany qabyldaýshy kásibı otbasy engiziledi. Bul týraly Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
— Respýblıkada jetim balalar men ata-anasynyń qamqorlyǵynsyz qalǵan balalardyń sany — 20 798, onyń ishinde qazaqstandyq azamattardyń otbasylarynda 17 110 bala tárbıelenýde, jetim balalar men ata-anasynyń qamqorlyǵynsyz qalǵan balalarǵa arnalǵan 111 uıymda 3 688 bala turady. Balanyń otbasyda ómir súrý jáne tárbıelený quqyǵy otbasyǵa ornalastyrýdyń balama nysandary arqyly júzege asyrylady: bala asyrap alý, qorǵanshylyq (qamqorshylyq), patronattyq tárbıe jáne qabyldaýshy otbasy, — dedi Úkimet basshysy jaýabynda.
Premer-Mınıstr málimetinshe, qabyldaýshy otbasylardy materıaldyq qoldaý jetim balalardy asyraýǵa aı saıynǵy járdemaqy (ár balaǵa 10 AEK), patronat tárbıeshiler men qabyldaýshy ata-analardyń qyzmetterine aqy tóleý (2023 jyly tólem mólsheri 58 myńnan 137 myń teńgege deıin eki esege ulǵaıtyldy), asyrap alýshylarǵa birjolǵy járdemaqy (75 AEK) arqyly júzege asyrylady. Sondaı-aq bala asyrap alýshylarǵa, qamqorshylarǵa bala kútimi boıynsha demalys beriledi, áleýmettik tólemder júrgiziledi, sondaı-aq salyq jeńildikteri kózdelgen.
— 2025 jyldyń shildesinen bastap otbasylyq ornalastyrýdyń jańa nysany — balany qabyldaýshy kásibı otbasy engiziledi, jetim balalardy, ata-anasynyń qamqorlyǵynsyz qalǵan balalardy, sondaı-aq arnaýly áleýmettik qyzmetterge muqtaj balalardy ınternattyq uıymdarǵa aparmaı, osy otbasylarǵa ornalastyrýǵa múmkindik beredi. Balany qabyldaýshy kásibı otbasylardy materıaldyq yntalandyrý maqsatynda olarǵa aı saıyn balany kútip-baǵýǵa járdemaqy (10 AEK), kásibı qabyldaýshy tárbıeshilerdiń qyzmetterine aqy (árqaısysyna 70 AEK) tólenetin bolady. Osylaısha, jetim balalar men ata-anasynyń qamqorlyǵynsyz qalǵan bala tárbıelep otyrǵan otbasylarǵa kórsetiletin memlekettik áleýmettik qoldaý, sondaı-aq balalardy otbasylyq ornalastyrýdyń balamaly nysandaryn damytý sońǵy 5 jylda jetim balalardyń sanyn azaıtýǵa (2021j. — 22 692, 2025 j. — 20 798) múmkindik berdi, — dedi Oljas Bektenov.
Buǵan deıin Úkimet basshysy jetim balalardy asyrap alý rásimin jeńildetý baǵytynda qandaı sharalar qolǵa alynǵanyn aıtqan edi.