Shildede jumys berýshiler Enbek.kz saıtynda 104 myńnan asa bos jumys ornyn jarııalady

ASTANA. KAZINFORM – Shildede jumys berýshiler «Enbek.kz» elektrondy eńbek bırjasynda 104,8 myń bos jumys ornyn ornalastyrdy. Bul maýsymmen salystyrǵanda 4,6 myńǵa (4%) az. Sonymen qatar bir aıda ótinish bergenderdiń sany 38 myńǵa (34%) artty – 147,8 myń túıindeme jarııalandy. 

Eńbek jáne halyqty áleýmettik qorǵaý mınıstrligi baspasóz qyzmetiniń málimetinshe, shildede bos jumys oryndarynyń aıtarlyqtaı ósýin Almaty (+28%, 4,2 myńǵa deıin) jáne Qyzylorda (+20%, 2,8 myńǵa deıin) oblystary, sondaı-aq Almaty qalasy (+20%, 7,9 myńǵa deıin) jáne Soltústik Qazaqstan oblysy (+17%, 4,7 myńǵa deıin) kórsetken. Bul rette bos jumys oryndarynyń eń kóp azaıýy Jambyl (-57%, 3,3 myńǵa deıin) jáne Túrkistan (-45%, 5,6 myńǵa deıin) oblystarynda baıqaldy. 

Shilde aıynda bos jumys oryndaryn ornalastyrǵan jumys berýshilerdiń kópshiligi bilim berý (20 myńnan astam bos jumys orny), qyzmettiń basqa túrletin kórsetetin uıymdar (16,5 myń), densaýlyq saqtaý (10,6 myń) jáne óńdeý (7,7 myń bos oryn) salalarynda boldy – osy salalardyń jıyntyq úlesi barlyq bos jumys ornynyń 57%-yn qurady. Bul rette bilim salasyndaǵy árbir tórtinshi bos oryn Astana jáne Almaty qalalarynda ornalastyryldy.

Naqty mamandyqtardyń ishinde jumys berýshiler arasynda eń kóp suranysqa ıe bolǵandar meıirgerler (2,2 myń bos jumys orny), tárbıeshiler (1,9 myń) jáne avtokólik júrgizýshileri (1,8 myń) boldy.

Biliktilik talaptary boıynsha suranys qurylymy joǵary bilikti jumys kúshine aýysty – shildede 32,9 myń bos jumys orny ornalastyryldy (31,4%). Biliktiligi joq jumysshylarǵa suranys ta ósti – 44,3 myń bos jumys orny (42,3%). Ortasha bilikti jumysshylar 26,3% jaǵdaıda ǵana (27,6 myń) izdestirildi.

Shilde aıynda túıindemelerdiń sany barlyq aımaqta túgel ósim kórsetti. Bul rette jumys izdeýshilerdiń belsendiligi birinshi kezekte Shymkent (+54%, 19,6 myń túıindeme), Qyzylorda (+46%, 9,3 myńǵa deıin) jáne Atyraý (+38%, 10,4 myńǵa deıin) oblystarynda aıtarlyqtaı ósti.

Eń joǵary jalaqyny kelesi mamandyqtar boıynsha: ushqysh (orta eseppen 1,8 mln teńgeden), synaq jáne jabdyqty retteý bóliminiń bastyǵy (~1,5 mln teńge) jáne IT salasyndaǵy tehnıkalyq dırektor (~1,4 mln teńge) úmitkerler kútken. Al naqty sektor usynatyn eń joǵary jalaqy tólenetin ashyq laýazymdar: taý-ken ónerkásibindegi ýchaske basshysynyń orynbasary (756 myń teńgeden), ýchaske basshysy (~747 myń teńge) jáne bas qurylysshy (~668 myń teńge).

Osylaısha, jazdyń ortasyna qaraı maýsymdyq suranystyń ósýinen keıin jumys berýshiler belsendiligi ishinara túzetildi, biraq jumys izdeýshilerdiń qyzyǵýshylyǵy jalǵasyn taýyp otyr.  Ásirese oqý oryndarynyń qyzmetkerleri arasynda joǵary bilikti eńbek segmentinde baıqalady.

Eske sala keteıik, buǵan deıin jumyssyz qazaqstandyqtarǵa memleketten tólem beriletinin jazǵan edik.