Shildede Qytaıda tutyný taýarlarynyń bólshek saýdasy 3,7 paıyzǵa ósti

ASTANA. KAZINFORM – Shildede Qytaıdaǵy tutyný taýarlarynyń jalpy bólshek saýda kólemi 3,88 trln ıýanǵa (shamamen 543,6 mlrd AQSh dollary) jetti. Bul ótken jyldyń sáıkes kezeńimen salystyrǵanda 3,7 paıyzǵa artyq kórsetkish, dep habarlaıdy Sınhýa.

Jyldyń alǵashqy jeti aıynda bul kórsetkish 28,42 trln ıýan bolyp, ótken jyldyń sáıkes kezeńimen salystyrǵanda 4,8 paıyzǵa artqan.

QHR Memlekettik statıstıka basqarmasynyń málimetinshe, tutyný taýarlaryn trade-in baǵdarlamasy boıynsha satyp alý naryqqa yntalandyrýshy áserin jalǵastyrǵan. Atap aıtqanda, iri rıteılerlerdegi turmystyq tehnıka men aýdıovızýaldy jabdyqtar satylymy jyldyq eseppen 28,7 paıyzǵa ósken, al jıhaz saýdasy 20,6 paıyzǵa artqan.

Onlaın-bólshek saýda da serpindi damyp keledi. Eseptik kezeńde onyń kólemi jyldyq kórsetkishpen 9,2 paıyzǵa ósti. Internet arqyly fızıkalyq taýarlar satylymy 6,3 paıyzǵa artyp, bólshek saýdanyń jalpy kóleminiń tórtten birine jýyq úlesin qurady.

Qyzmet kórsetý salasyndaǵy tutyný da turaqty ósim kórsetti. 2025 jylǵy qańtar-shilde aralyǵynda bul sektordaǵy bólshek saýda kólemi ótken jyldyń sáıkes kezeńimen salystyrǵanda 5,2 paıyzǵa artty.

MSB ókili Fý Lınhýeıdiń aıtýynsha, týrızm konsaltıngi, kólik qyzmetteri, mádenıet, sport jáne oıyn-saýyq salalarynda eki tańbaly ósim tirkelgen.

Fý Lınhýeı memleket qabyldap otyrǵan sharalar tutynýdy keńeıtýge jáne jańa ósim núktelerin qalyptastyrýǵa yqpal etetinin atap ótti. Degenmen, ol syrtqy belgisizdikter men ishki satyp alý qabiletiniń shekteýleri áli de syn-qater týdyryp otyrǵanyn eskertti.

Onyń aıtýynsha, aldaǵy ýaqytta tutynýdy yntalandyrýǵa baǵyttalǵan maqsatty bastamalardy júzege asyrý, qyzmet kórsetý salasynda jańa ósý draıverlerin damytý, tutynýshylyq ortany jetildirý jáne naryqtyń turaqty damýyn qamtamasyz etý sharalary qolǵa alynbaq.

Aıta keteıik, AQSh Qytaıǵa zańsyz jetkizilýi múmkin mıkrochıpterge jasyryn trekerler ornatyp jatyr.