Shildede Qazaqstannyń 10 oblysynda qurǵaqshylyq bolýy múmkin

ASTANA. KAZINFORM – Elimizde atmosferalyq qurǵaqshylyq bastalý qaýpi bar aýmaqtar ulǵaıyp keledi. Bul týraly «Qazgıdromet» RMK bas dırektorynyń birinshi orynbasary Serik Saıyrov aıtyp berdi.

Onyń aıtýynsha, shilde aıynda Qazaqstan aýmaǵynda ylǵaldaný jaǵdaıy kóbinese kópjyldyq mánderge jýyq bolady dep kútilýde, alaıda naqty qalyptasqan aýa raıy jaǵdaılaryn jáne aldaǵy aı boljamyn eskere otyryp, qurǵaqshylyq kútiletin aýdandar tizimi jasaldy. Olar:

• Qostanaı oblysynyń Amangeldi jáne Jangeldi aýdandarynda;

• Aqtóbe oblysynyń Áıteke bı aýdanynda, Baıǵanın, Oıyl, Hromtaý jáne Shalqar aýdandarynda;

• Qaraǵandy oblysynyń Shet aýdanynda;

• Ulytaý oblysynyń Ulytaý jáne Jańaarqa aýdandarynyń jeke pýnktterinde;

• Almaty oblysynyń Balqash jáne Jambyl aýdandarynda;

• Jambyl oblysynyń Moıynqum, Jýaly jáne T. Rysqulov aýdandarynda;

• Túrkistan oblysynyń Arys, Sozaq, Qazyǵurt, Túrkistan, Otyrar jáne Báıdibek aýdandarynda;

• Qyzylorda oblysynyń Aral, Qazaly, Qarmaqshy, Shıeli aýdandarynda;

• Mańǵystaý oblysynyń Beıneý, Mańǵystaý jáne Qaraqııa aýdandarynda;

• Atyraý oblysynyń basym bóliginde.

Al tamyz aıynda respýblıkanyń basym bóliginde ortasha aýa temperatýrasy norma shamasynda bolady dep kútilýde.

Búǵan deıin S. Saıyrov maýsym aıynyń sońǵy onkúndiginde qandaı aýa raıy boljanǵanyn aıtyp bergen edi.