Shildede eldiń basym bóliginde aýa temperatýrasy norma sheginde bolady – mınıstrlik
ASTANA. KAZINFORM — Shildede Batys Qazaqstan, Atyraý, Mańǵystaý oblystarynda jáne Aqtóbe óńiriniń basym bóliginde temperatýra 1-2 gradýsqa artýy múmkin. Bul týraly Úkimet otyrysynda Ekologııa jáne tabıǵı resýrstar mınıstri Erlan Nysanbaev málim etti.
- Shilde aıynda Qazaqstan aýmaǵynyń basym bóliginde aýa temperatýrasy norma sheginde bolady dep boljanyp otyr. Batys Qazaqstan, Atyraý, Mańǵystaý oblystarynda jáne Aqtóbe óńiriniń basym bóliginde temperatýra 1-2 gradýsqa artýy múmkin. Shyǵys óńirlerde jaýyn-shashyn normadan kóp, al soltústik jáne ortalyq óńirlerde negizinen norma shamasynda. Bul rette eldiń batysynda boljam boıynsha jaýyn-shashyn normadan az bolady, - dedi E.Nysanbaev.
Onyń sózine qaraǵanda, jalpy vegetatsııalyq maýsymnyń bastalýy egin egý jumystaryn júrgizýge jáne ónim qalyptastyrýǵa qolaıly dep baǵalandy.
- Sonymen birge, jaz aılaryna arnalǵan boljam aldyn ala ekenin eskergen jón. Bul rette, Mınıstrlikke qarasty «Qazgıdromet» qyzmeti osy jyldan bastap jasandy ıntellekt elementteri bar tsıfrlyq quraldardy qoldanatynyn atap ótken mańyzdy. Bul - VRF tsıfrlyq modeli (WRF – Weather Research and Forecasting – aýa raıyn sandyq boljaý modeli). Ol 2 jáne 6 kılometrlik keńistikterde 48 saǵat jáne 10 táýlikke deıingi kezeńge boljam jasaýǵa múmkindik beredi. Atalǵan tehnologııalardy paıdalaný boljamdardyń, onyń ishinde agrometeorologııalyq jáne gıdrologııalyq, sondaı-aq daýyldy eskertýlerdiń naqtylyǵyn arttyrýdy qamtamasyz etedi, - dedi mınıstr.
Budan buryn habarlanǵandaı, bıyl eldegi jalpy egis alańy 23,8 mln gektar boldy.
