Shildede bıznes sýbsıdııany kepildendirýdiń jańa tetikteri kúshine enedi

ASTANA. KAZINFORM — Bızneske beriletin sýbsıdııa men nesıeni kepildendirý tetigi eki qor arqyly júzege asyrylady. Kepildendirýdiń jańa tetikteri týraly Astana qalasynyń ınvestıtsııalar jáne kásipkerlikti damytý basqarmasy basshysynyń orynbasary Qýanysh Saparov aıtyp berdi.

— Bıyl 2 shildeden bastap biryńǵaı keshendi baǵdarlamaǵa sýbsıdııalaý jáne kepildendirý tetikterine ózgerister engiziledi. Syıaqy mólsherlemesin sýbsıdııalaý shaǵyn jáne mıkro kásipkerlik sýbektilerine, sonyń ishinde áleýmettik kásipkerlerge ekonomıkanyń basym sektorlarynda (óńdeýshi ónerkásip, bilim berý, týrızm, densaýlyq saqtaý taǵy basqa) beriledi. Sýbsıdııa arqyly beriletin nesıeler ınvestıtsııalyq maqsatqa, aınalym qarajatyn tolyqtyrýǵa (3 jylǵa deıin), sondaı-aq aǵymdyq nesıeni qaıta qarjylandyrýǵa 1 jylǵa deıin) baǵyttalady, — dedi Qýanysh Saparov Astana qalasy kommýnıkatsııalar qyzmeti alańynda ótken baspasóz máslıhatynda.

Odan ári ákimdik ókili sýbsıdııalaý jáne kepildendirý tetikterin túsindirdi. 

— Sýbsıdııalanatyn nesıeniń eń joǵarǵy somasy — 200 mln teńge. Qaryz alýshy úshin sońǵy mólsherleme — keminde 12,3%, áleýmettik kásipkerler úshin — 11,3%. Sondaı-aq, «Damý» qory tarapynan jańa «Órleý» baǵdarlamasy iske qosylmaq. Bul qural óńdeýshi ónerkásip, agroónerkásiptik keshen, kólik, bilim berý, medıtsına sııaqty basym sektorlarǵa jatatyn mıkro, shaǵyn jáne orta bızneske arnalǵan. Jeńildetilgen nesıe sharttary boıynsha ınvestıtsııalyq maqsatta — 7 mlrd teńgege deıin, aınalym qarajatyna — 3,5 mlrd teńgege deıin, paıyzdyq mólsherleme — 12,6%-dan aspaıdy, ınvestıtsııa merzimi — 10 jylǵa deıin, aınalym qarajaty — 3 jylǵa deıin, — dep tolyqtyrdy spıker.

Sýbsıdııa men nesıeni kepildendirý tetigi eki qor arqyly júzege asyrylady.

Birinshi kepildik qory sheńberinde mıkro, shaǵyn, orta jáne iri kásipkerlik sýbektileri ekinshi deńgeıli bankterden, lızıng kompanııalarynan, ulttyq holdıngterge qarasty uıymdardan jáne azyq-túlik korporatsııasynan nesıe ala alady. Kepil jetkiliksiz bolǵan jaǵdaıda, memlekettik kepildik kólemi 85%-ǵa deıin (3,5 mlrd teńgege deıin) beriledi.

Qarjy baǵyty — ınvestıtsııa, qaıta qarjylandyrý — 7 mlrd teńgege deıin, aınalym qarajaty — 3,5 mlrd teńgege deıin, kepildik merzimi, búkil qarjylandyrý merzimine jáne qosymsha 5 aıǵa deıin.

Kásipkerdiń kepildik alý protsesi jeńildetilgen — bank oń sheshim qabyldaǵannan keıin qujattar paketin «Damý» qoryna ózi joldaıdy. Ótinimdi qaraý merzimi — 2 jumys kúni. Alaıda, bul quraldardy qoldaný úshin kásipker salyq túsimin jáne jumys oryndaryn 2 qarjylyq jyl ishinde 10%-ǵa arttyrýy tıis. Sonymen qatar, kásipker kepildik somasynyń 1,5% bir ret, keıinnen jyl saıyn qalǵan somadan tóleýi qajet. Tıisinshe, komıssııa kólemi jyl saıyn azaıady.

— Astana qalasynda qazir kepildik qor aıasynda 79 jobaǵa qoldaý kórsetilip, jalpy nesıe somasy — 15,7 mlrd teńge, kepildik somasy — 8,7 mlrd teńge boldy, — deıdi Q. Saparov.

Ekinshi kepildik qor aıasynda ınvestıtsııalyq jáne qaıta qarjylandyrý maqsatynda kepildik somasy 7 mlrd teńgeden joǵary, biraq jobanyń jalpy qunynyń 30%-dan aspaýy tıis. Aınalym qarajaty úshin — 40%-dan aspaýy tıis. Merzimi — 15 jylǵa deıin.

Baǵyty birinshi kepildik qormen uqsas, biraq salalyq shekteýler bar, ıaǵnı óńdeýshi ónerkásip, taý-ken ónerkásibi, agroónerkásiptik keshen jáne ınfraqurylymdyq sektor.

— Sonymen birge kásipker jobanyń qunynyń keminde 20%-yn (aqsha, jyljymaly, jyljymaıtyn múlik) ózi qarjylandyrýy tıis. Ekinshi kepildik qor aıasynda ekinshi deńgeıli banktermen qatar, oblıgatsııalar men optsıondar boıynsha da kepildik berý qarastyrylǵan. Bıyl atalǵan qor boıynsha jobalar túsken joq. Jergilikti bıýdjet esebinen sýbsıdııalaý, kepildendirý jáne jeńildetilgen nesıeleý «Damý» qory arqyly júzege asyrylady, — deıdi basqarma basshysynyń orynbasary.

Tolyq aqparat alý úshin Astana qalasy boıynsha «Damý» qory fılıalyna habarlasýǵa bolady. Mekenjaıy: Máńgilik El 55A.

Buǵan deıin habarlaǵanymyzdaı Astanada shaǵyn jáne orta bıznes sýbektileri 8,3 paıyzǵa kóbeıdi. Elordada ótken jyly shaǵyn jáne orta bıznes sýbektileri 15,8 trln teńgege taýar óndirip, qyzmet kórsetken.