Shildede áleýmettik mańyzy bar azyq-túlik baǵasy alǵash ret tómendedi
ASTANA. KAZINFORM – Qazaqstanda shilde aıynyń qorytyndysy boıynsha áleýmettik mańyzy bar azyq-túlik taýarlarynyń baǵasy 0,3%-ǵa tómendedi. Bul – bıyl alǵash ret atalǵan sanattaǵy ónimder boıynsha aılyq deflıatsııanyń tirkelýi, dep habarlaıdy Saýda jáne ıntegratsııa mınıstrligi.
Vedomstvonyń málimetinshe, sońǵy bir aptada áleýmettik mańyzy bar azyq-túlik taýarlary baǵasynyń ındeksi 0,1%-ǵa tómendegen. Osy kezeńde kartop, qyzanaq, qııar, alma, sábiz jáne jumyrtqa sııaqty birqatar ónimniń ortasha baǵasy arzandaǵan.
Azyq-túlik ınflıatsııasynyń jyldyq qarqyny da qatarynan altynshy aı baıaýlap keledi. Eger 2025 jylǵy jeltoqsanda bul kórsetkish 13,5% bolsa, bıyl maýsym aıynyń qorytyndysynda 10,4%-ǵa deıin tómendegen.
– Jyl basynan beri áleýmettik mańyzy bar azyq-túlik taýarlary baǵasynyń ındeksi 1,7%-dy qurady. Byltyr osy kezeńde bul kórsetkish 7,9% bolǵan edi. Mundaı nátıjege Úkimettiń ınflıatsııany baqylaý jáne tómendetý jónindegi keshendi sharalarynyń júıeli iske asyrylýy yqpal etti, – delingen habarlamada.
Baǵany turaqtandyrý maqsatynda saýda ústemesiniń shekti mólsherin baqylaý jáne ónimdi tutynýshyǵa jetkizý tizbegindegi negizsiz deldaldardy qysqartý jumystary jalǵasyp jatyr.
Jyl basynan beri shekti saýda ústemesin asyrǵany úshin jalpy somasy 70 mln teńgeden asatyn 2 709 ákimshilik qaýly shyǵaryldy. Óńirlik komıssııalardyń 650 otyrysy ótkizilip, 2 640 zań buzýshylyq anyqtaldy. Sonyń nátıjesinde 2 463 ákimshilik hattama toltyrylyp, 177 negizsiz deldal jetkizý tizbeginen shyǵaryldy.
Sonymen qatar elektrondyq shot-faktýralar negizinde 30 myńǵa jýyq taýar ótkizý tizbegi taldanyp, zań talaptarynyń buzylý qaýpi bar 4,6 myńnan astam jaǵdaı anyqtalǵan.
– Óńirlerde turaqtandyrý qorlary men aınalym tetigi tıimdi paıdalanylyp jatyr. Maýsymaralyq kezeńde ımporttyq kókónis ónimderin jetkizý úshin «jasyl dáliz» jumys isteıdi. Sondaı-aq erte pisetin kókónisterdi jetkizýge arnalǵan forvardtyq kelisimsharttar jasalyp, balamaly logıstıkalyq baǵyttar damytylýda, – dep málimdedi Úkimettiń baspasóz qyzmeti.
Bıyl elimizde 9,8 myńǵa jýyq aýyl sharýashylyǵy jármeńkesin ótkizý josparlanǵan. Qazirgi ýaqytta onyń 4,6 myńy uıymdastyryldy. Sonymen qatar jergilikti atqarýshy organdarǵa turǵyn úılerge jaqyn aýmaqtarda shaǵyn jármeńkeler sanyn kóbeıtý tapsyrylǵan.
Otandyq óndirýshilerdi qoldaý maqsatynda jeńildetilgen nesıeler berilip, áleýmettik mańyzy bar azyq-túlik taýarlary men olardy óndirýge qajetti shıkizatty temirjol arqyly tasymaldaýǵa tómendetilgen tarıfter, sondaı-aq elektr energııasyna jeńildetilgen baǵalar qoldanylyp keledi.
Aıta keteıik, buǵan deıin birqatar azyq-túlik baǵasy arzandaǵan bolatyn.
