Shildede alaıaqtyq tranzaktsııalardy anyqtaıtyn Antıfrod-ortalyǵy iske qosylady
ASTANA. KAZINFORM – Osy jyldyń shildesinde alaıaqtyq tranzaktsııalardy anyqtap, jedel den qoıatyn Antıfrod-ortalyǵy iske qosylady. Bul jaıynda Májilis depýtattarynyń saýalyna Ulttyq bank tóraǵasy Tımýr Súleımenovtiń jaýabynda aıtylǵan.
«Qarjy naryǵyndaǵy alaıaqtyqqa qarsy is-qımyl maqsatynda Ulttyq bank Májilistiń depýtattyq korpýsynyń qoldaýymen 2024 jylǵy 21 mamyrdaǵy № 86-VIII «Qazaqstan Respýblıkasynyń keıbir zańnamalyq aktilerine baılanys, tsıfrlandyrý, ınvestıtsııalyq ahýaldy jaqsartý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zańy aıasynda qabyldanǵan Antıfrod-ortalyqty qurý jóninde zańnamalyq túzetýler ázirledi», - dep atap ótedi Tımýr Súleımenov jaýabynda.
Onyń atap ótýinshe, Zańdy iske asyrý maqsatynda Ulttyq bank qarjy uıymdary men memlekettik organdar arasynda jedel aqparat almasý, sondaı-aq alaıaqtyq operatsııalarǵa den qoıý úshin Antıfrod-ortalyq ınfraqurylymyn iske asyrady. Ortalyqtyń mynadaı mindetteri bar:
- alaıaqtyq tranzaktsııalardy anyqtaý jáne olarǵa jedel den qoıý, onyń ishinde olar boıynsha qarajatty buǵattaý (tranzaktsııany bastamalaý men oryndaýdyń barlyq kezeńderinde toqtata turý);
- alaıaqtyq operatsııalar boıynsha qarjy naryǵyna qatysýshylar arasynda naqty ýaqyt rejıminde aqparat almasý;
- alaıaqtyq operatsııalardyń biryńǵaı derekqoryn júrgizý, alaıaqtyq belgileri bar tólem operatsııalaryn taldaý jáne qarjy uıymdardyń quqyq qorǵaý organdarymen ózara is-qımylyn uıymdastyrý.
«Osylaısha, alaıaqtyq operatsııalardyń belgileri bar azamattardyń shottaryn buǵattaý tetigi Zań júzinde qalyptasqan dep sanaımyz. Qazirgi ýaqytta Ulttyq banktiń enshiles uıymy - «Qazaqstan Respýblıkasy Ulttyq bankiniń Ulttyq tólem korporatsııasy» AQ bazasynda 13 banktiń jáne «Qazposhta» AQ-tyń qatysýymen testilik rejımde jumys isteıtin Antıfrod-ortalyq platformasy ázirlendi. Alaıaqtyqqa baılanysty ıntsıdenttermen jumys isteý jáne qarjy uıymdarymen aqparat almasý bóliginde jeke fýnktsıonal ázirlengen ishki ister organdary platformaǵa qosylý satysynda tur», - dedi ol.
UB tóraǵasynyń dereginshe, Antıfrod-ortalyqty ónerkásiptik engizý Zań qoldanysqa engizilgen sátten, ıaǵnı 2024 jylǵy 22 shildeden bastap josparlanyp otyr.
«Ulttyq bank alaıaqtyqqa qarsy is-qımyldyń tıimdi tetigin qurý máselesine basymdyq beretinin atap ótemiz. Osyǵan baılanysty Antıfrod-ortalyq bazasynda alaıaqtyq qyzmetti júzege asyrý ádisterin taldaý jáne zańsyz oıyn bıznesi men esirtki aınalymyn qosa alǵanda, quqyqqa qarsy operatsııalarǵa qarsy kúres jóninde pármendi sharalar ázirleý jónindegi quzyretter ortalyǵy qurylatyn bolady», - dedi Tımýr Súleımenov.
