Shilde aıynda sot oryndaýshylardyń jumysyn baǵalaıtyn jasandy ıntellekt iske qosylady
ASTANA. KAZINFORM — Premer-mınıstr Oljas Bektenov Senat depýtatynyń saýalyna joldaǵan jaýapta sot oryndaýshylardyń tsıfrlyq assıstentine qandaı fýnktsııalar beriletinin málim etti.
— Sot oryndaýshylarynyń áreketin avtomattandyryp, atqarý organdarynyń biryńǵaı aqparattyq júıesinde baqylaý jáne formattyq logıkalyq fýnktsııalardy engizý baǵytynda belsendi jumys júrgizilip jatyr. Atqarýshylyq is júrgizýdiń múddeli taraptaryna, sondaı-aq ýákiletti organǵa qabyldanǵan protsestik sheshimderdi qadaǵalaýǵa múmkindik beretin «tsıfrlyq assıstent» fýnktsıonaly ázirlenip jatyr, — dep jazylǵan jaýapta.
Bul júıe jasandy ıntellekt kómegimen sot oryndaýshylardyń áreketin baǵalaýǵa múmkindik bermek.
— Óz kezeginde fýnktsıonal atqarýshylyq is júrgizý boıynsha statıstıkalyq derekterdi alýdy, merzimder men qabyldanǵan sharalarǵa baqylaý júrgizýdi, azamattardyń shaǵymdaryn avtomatty túrde taldaýdy jáne buzýshylyqtardy joıý týraly habarlamalar qalyptastyrýdy qamtamasyz etedi. Odan bólek, «jasandy ıntellekt» elementterin qoldaný sot oryndaýshysynyń atqarýshylyq is júrgizý jónindegi is-áreketin ýaqtyly baǵalaýǵa múmkindik beredi. Osy fýnktsıonalda jasandy ıntellekt elementterin qoldaný sheshim qabyldaýǵa sýbektıvti faktordyń áserin azaıtýǵa, sot oryndaýshylarynyń is-áreketiniń ashyqtyǵyn arttyrýǵa jáne azamattardan túsetin negizdelgen shaǵymdardyń sanyn azaıtýǵa múmkindik beredi. Tıisinshe, atqarýshylyq is júrgizýge qatysy bar jeke jáne zańdy tulǵalar ózderiniń dálelderin júıeden alynǵan málimettermen rastaı alady, — deıdi Oljas Bektenov.
Úkimet basshysynyń málimetine qaraǵanda talǵan pılottyq joba shilde aıyna josparlanǵan jáne respýblıkalyq bıýdjetten qosymsha qarjylandyrýdy talap etpeıdi.
Eske salsaq, sáýir aıynda Májiliste ótken Úkimet saǵatynda Sot oryndaýshylar «Otbasy bank» salymshylarynan 3,4 mlrd teńge jymqyrǵany málim bolǵan edi.