Shilde aıynda qandaı iri týrıstik is-sharalar ótedi
ASTANA. KAZINFORM — Shilde aıynda Qazaqstannyń birneshe óńirinde mádenı, mýzykalyq jáne gastronomııalyq baǵyttaǵy iri týrıstik festıvalder ótedi. Týrızm jáne sport mınıstrliginiń 2026 jylǵy týrıstik is-sharalar kúntizbesine engen bul jobalar óńirlerdiń týrıstik áleýetin arttyryp, ishki jáne kelý týrızmin damytýǵa baǵyttalǵan. Bul týraly Týrızm jáne sport mınıstrligi málim etti.
Shilde aıynda Qazaqstannyń birneshe óńirinde mádenı, mýzykalyq jáne gastronomııalyq baǵyttaǵy aýqymdy týrıstik is-sharalar uıymdastyrylady. Bul festıvalderdiń barlyǵy Týrızm jáne sport mınıstrligi bekitken 2026 jylǵy negizgi týrıstik is-sharalar kúntizbesine engizilgen.
Kúntizbedegi is-sharalar oqıǵaly jáne gastronomııalyq týrızmdi damytýǵa, óńirlerdiń týrıstik áleýetin nasıhattaýǵa, sondaı-aq ishki jáne kelý týrızmin jandandyrýǵa baǵyttalǵan.
5 shildede Astanada ulttyq mýzykalyq murany saqtaý men dáripteýge arnalǵan «Asyl mura» festıvali ótedi. Baǵdarlama aıasynda halyq mýzykasy oryndaýshylarynyń kontserti, dástúrli mýzykalyq aspaptarda oınaýdan sheberlik sabaqtary jáne mádenı-aǵartýshylyq is-sharalar uıymdastyrylady.
Sol kúni Petropavlda «Qyzyljar áýeni» halyqaralyq festıvali bastalyp, 12 shildege deıin jalǵasady. Festıvalge Qazaqstanmen qatar Eýropa elderi men AQSh-tan kelgen ónerpazdar men shyǵarmashylyq ujymdar qatysady.
10-12 shilde kúnderi Shyǵys Qazaqstan oblysynyń Katonqaraǵaı aýdanynda «Altaı – túrki áleminiń altyn besigi» festıvali ótedi. Baǵdarlamada etnomádenı is-sharalar, qolónershiler jármeńkesi, sheberlik sabaqtary, ulttyq sport oıyndary jáne kontserttik baǵdarlama qamtylǵan.
11-12 shilde kúnderi Astana qalasynda gastronomııalyq týrızmdi damytýǵa jáne ulttyq dástúrlerdi nasıhattaýǵa arnalǵan Bai Qymyz gastronomııalyq festıvali ótedi. Іs-shara aıasynda qymyz óndirýshiler baıqaýy, ulttyq taǵamdar men qymyzdyń dámin tatý, ulttyq kıimder kórsetilimi, taqyryptyq konferentsııa jáne kontserttik baǵdarlama uıymdastyrylady.
18 shildede Túrkistan oblysynda qazaq valsiniń koroli atanǵan kompozıtor Shámshi Qaldaıaqovtyń shyǵarmashylyǵyna arnalǵan «Shámshi ánderi» festıvali ótedi. Baǵdarlamaǵa kontsertter, mýzykalyq keshter jáne mádenı is-sharalar engizilgen.
Al 25 shildede Jetisý oblysyndaǵy Alakól jaǵalaýynda «Alakól tolqyny» festıvali uıymdastyrylady.
30 shilde men 1 tamyz aralyǵynda Batys Qazaqstan oblysynda aýyl sharýashylyǵy men agrotýrızmdi damytýǵa arnalǵan «Jer yrysy» agrofestıvali ótedi.
Negizgi týrıstik is-sharalardy ótkizý oqıǵaly týrızmdi damytýǵa, óńirlerdiń týrıstik tartymdylyǵyn arttyrýǵa, jergilikti kásipkerlikti qoldaýǵa jáne Qazaqstannyń baı mádenı murasyn keńinen tanytýǵa yqpal etedi.
Eske sala keteıik, jaqynda Qarqara jaılaýynda 35 myń qonaq qatysatyn «Qymyzmuryndyq» merekesi boldy.
