ShQTÝ aktıvteri memleketke qaıtaryldy: 1,5 mlrd teńgeniń múlki men jer telimi

ASTANA. KAZINFORM – Qarjy monıtorıngi agenttiginiń ShQO boıynsha departamenti memleket qatysatyn úlesti zańsyz ıelikten shyǵarý faktisi boıynsha tergeýdi aıaqtady. 

D.Serikbaev atyndaǵy Shyǵys Qazaqstan tehnıkalyq ýnıversıteti — eldegi jetekshi joǵary oqý oryndarynyń biri. Ýnıversıtet metallýrgııa, mashına jasaý, energetıka, medıtsınalyq tehnıka jáne basqa da salalar úshin mamandar daıarlaýmen aınalysady. Onyń quramynda 17 ǵylymı ortalyq, zerthana jáne ǵylymı-óndiristik alań jumys isteıdi.

Alaıda, 2018–2020 jyldary ýnıversıtettiń burynǵy basshylyǵy «Tehnopark «Altaı» JShS-niń jarǵylyq kapıtalyndaǵy 78% memlekettik majorıtarlyq úlesti zańsyz túrde jekemenshikke ótkizgen.

— Memleket basshysynyń zańsyz shyǵarylǵan aktıvterdi qaıtarý jónindegi tapsyrmasyn oryndaý aıasynda ýnıversıtetke jalpy quny 1,5 mlrd teńge bolatyn «Tehnopark «Altaı» JShS-degi 100% úles, 8 myń sharshy metrlik ǵımarat pen 1,3 ga jer telimi qaıtaryldy. Qaıtarylǵan aktıvter zerthanalyq jáne oqý bazalaryn ornalastyrýǵa, sondaı-aq travmatologııa, ortopedııa jáne onkologııalyq protezdeýge arnalǵan medıtsınalyq ónimder shyǵaratyn ınnovatsııalyq klasterdi damytýǵa paıdalanylatyn bolady, — delingen QMA habarlamasynda.

Aktıvterdi qaıtarý jumysy jalǵasady. 

Aıta ketelik jekege ótip ketken ShQTÝ tehnoparki memleketke qaıtarylǵany týraly jazǵan edik.