ShQO: Zyrıanda sý birtindep qaıtyp kele jatyr
ÓSKEMEN. QazAqparat - Besqaraǵaı aýdanynyń Birlik aýylynan 70 adam kórshi aýylǵa kóshirildi. Onyń ishinde 10 bala bar, dep habarlaıdy QazAqparat tilshisi.
Qazir atalmysh aýdandaǵy jaǵdaı turaqtalǵan. Muz jarý jumystarynyń arqasynda Ertistiń tasýy toqtady. Al Zyrıan aýdanynda qutqarýshylardyń damyl tabatyn túri joq.
«Kóp mólsherde kirgen sý birtindep qaıtyp jatyr. Іsteıtin jumys áli jeterlik», - deıdi oblystyq tótenshe jaǵdaılar departamentiniń baspasóz qyzmetiniń basshysy Anastasııa Sklıar.
Úıi sýdan arylǵan turǵyndardyń aldy baspanalaryna oralyp jatyr. Órt sóndirý qyzmeti men aeroutqyr apattyq qutqarý jasaǵynyń mamandary kún-tún demeı sý sorý jumystaryn júrgizýde. Olar 1 úıdi sýdan aryltý úshin shamamen 1 saǵat jumsaýda. Qutqarýshylar úılerdi sý men laıdan tazartyp qana qoımaı, turǵyndarǵa aýlasy men qorajaıyn jınastyrýǵa da kómektesip júr.
Al Maleev aýylyna jiberilgen qutqarýshylar turǵyndarǵa ákelingen gýmanıtarlyq kómekti úı-úıge taratyp bergen. Zyrıan qalasynyń sý sorǵysh stansa aımaǵynda jaǵdaı áli kúrdeli. Munda jumys istep jatqan 20-dan astam motorly sorǵynyń gúrili túnde de tynyshtalar emes. 3 táýlikte sý deńgeıi 30 santımetrge ǵana túsken. Keıbir úılerde sýdyń deńgeıi 1,5 metrden asyp otyr.
«Qutqarýshylardyń taǵy bir toby Zýbov kenti men Snegırev, Maleev aýyldarynda júr. Sońǵy kúnderi aýdan boıynsha 500-den astam turǵyn úılerine qaıtty. Evakýatsııa ortalyqtarynda 24 adam qalǵan. Taǵy 330-deı turǵyn týystaryn panalaýda», - delingen departamenttiń resmı málimetinde.
Al Semeıde Ulttyq ulan sarbazdary halyqqa kómir taratty. Besqaraǵaı aýdanynyń Birlik aýylynda turatyn 70 adam Glýhovka aýylynyń mektebine kóshirilgen bolatyn. Degenmen úılerge tasqynnan keletin qaýiptiń beti toıtaryldy.
