ShQO júrgizýshileri medıtsınalyq anyqtamalardyń qymbattaýyna narazy
ASTANA. QazAqparat - Shyǵys Qazaqstan oblysynda, Ákimshilik polıtsııa basqarmasynda adamdar memlekettik qyzmetterdi alý barysynda betpe-bet keletin problemalar boıynsha júgine alatyn qoǵamdyq qabyldaý óz jumysyn bastady, dep habarlaıdy QazAqparat.
Qoǵamdyq qabyldaýdyń alǵashqy kúninde júrgizýshi kýáligin alý nemese aıyrbastaý barysynda týyndaıtyn eń ótkir máseleler kóterildi. Atap aıtqanda, sóz narkologııalyq jáne psıhıatrııalyq dıspanserden medıtsınalyq kýálandyrýdan ótý jaıynda bolyp otyr. Júrgizýshi kýáligin aıyrbastaý nemese aýystyrý barysynda osy eki jeke anyqtamalardy alýy qajet. Sonyń negizinde quny shamamen myń teńgeni quraıtyn úshinshi «júrgizýshi anyqtamasy» beriledi. Osydan keıin júrgizýshi memlekettik baj salyǵyn tóleýi tıis. Jańa talapqa sáıkes júrgizýshi kýáliginiń jaramdylyq merzimi ótip ketken jaǵdaıda kólik ıesiniń rýlge otyrýǵa quqy joq.
Dál osy kúni qabyldaýǵa kelgen júrgizýshi Sergeı Nechaev medıtsınalyq anyqtamalardyń árqaısysynyń quny 4 myń teńgeden asatyndyǵyna túsinbeı dal. Demek, eki anyqtamaǵa 9 myń teńge tóleýge týra keledi. Al olardyń ornyna jumysqa ornalasý barysynda alatyn 250 teńgelik medıtsınalyq anyqtamany nege qoldanýǵa bolmaıdy?
Qoǵamdyq qabyldaý músheleri bul suraqqa baılanysty oblystyq densaýlyq saqtaý basqarmasyna «dárigerler qyzmetiniń qymbattaýyn» túsindirýin talap etip saýal daıyndady jáne qalalyqtarǵa jaýap kelgen soń birden habarlaýǵa ýáde berdi. Osy kúni ishki ister departamentiniń emtıhan alý, tirkeý qyzmetine de qatysty kóptegen suraq tústi. Ákimshilik polıtsııa qyzmetkerleriniń túsindirýinshe, kólik júrgizýdi úırengisi kelgen azamattar narkologııalyq jáne psıhıatrııalyq dıspanserden medıtsınalyq anyqtama almaıynsha rýlge otyrýlaryna quqyqtary joq.
