ShQO joldaryndaǵy sý basý qaýpi joǵary ýchaskeler sany azaıdy
ÓSKEMEN. KAZINFORM – Shyǵys Qazaqstan oblysyndaǵy jol qyzmetteri respýblıkalyq mańyzy bar tasjoldardyń sý tasqyny qaýpi joǵary ýchaskeleriniń sanyn qysqartty. Eki jyl buryn mundaı ýchaskeler sany 13 bolsa, qazir olardyń sany 5-ke deıin azaıyp otyr.
Bul kórsetkishke ınjenerlik jumystardyń nátıjesinde qol jetkizildi. Atap aıtqanda, kópirler salý, qosymsha sý ótkizgish qubyrlar ornatý jáne jol ınfraqurylymyn nyǵaıtý jumystary júrgizilgen.
– 2024 jyldyń qorytyndysy boıynsha bizde 13 sý tasqyny qaýpi bar ýchaske bolǵan. Ótken jyly kópirler salynyp, sý ótkizgish qubyrlar ornatyldy. Qazirgi tańda mundaı ýchaskelerdiń sany beseý ǵana, - dedi «QazAvtoJol» ulttyq kompanııasy ShQO fılıalynyń dırektory Nurbek Temirhanov.
Búginde óńirdegi respýblıkalyq mańyzy bar joldardyń jalpy uzyndyǵy 1 238 shaqyrymdy quraıdy. Onda 88 kópir jáne myńnan astam sý ótkizgish qubyr ornalasqan. Olar erigen qar sýynyń qaýipsiz ótýin qamtamasyz etedi.
– Sý basý qaýpi bar ýchaskelerdiń barlyǵynda sý tasqynyna qarsy sharalar júrgizilip, joldy sý basý qaýpin azaıtý úshin qorǵanys úıindileri turǵyzyldy. Biz turaqty túrde reıdtik tekserýler júrgizip, jaǵdaıdy baqylaýda ustap otyrmyz, - dedi Jol aktıvteri sapasy ulttyq ortalyǵy ShQO fılıalynyń bólim basshysy Saıahat Musapyrov.
Sonymen qatar jol qyzmetteri sý tasqyny qaýpine jedel áreket etý úshin qajetti materıaldardy daıyndap qoıdy. Atap aıtqanda, 2 000 m³ qum-qıyrshyq tas qospasy, 10 myń ydys-qap daıyndaldy.
– Óńirde jedel áreket etý úshin arnaıy apattyq brıgadalar qurylǵan. Qar qarqyndy erigen kezeńde olar joldardyń eń kúrdeli ýchaskelerinde táýlik boıy kezekshilik atqarady, - dedi «Qajservıs» JShS ShQO fılıalynyń dırektory Nııaz Sadyqov.
Eske salsaq, osyǵan deıin joldardaǵy sý shaıý qaýpi bar 229 ýchaske Kólik mınıstrliginiń baqylaýyna alynǵany habarlanǵan.
