ShQO joldarynda qys kezinde qaýipti 22 ýchaske bar

ÓSKEMEN. KAZINFORM — Shyǵys Qazaqstan oblysynyń joldaryndaǵy 22 qaýipti ýchaske qysqa daıyndalyp jatyr.

metel, býran, zıma, zakryta doroga, boran, qys, jol jabyq
Foto: Aǵybaı Aıapbergenov / Kazinform

Qys mezgilinde óńir joldary úshin qarly boran, kóktaıǵaq pen qar kóshkini naǵyz synaqqa aınalady. Ásirese qar jıi úıiletin jáne taýly aımaqtardaǵy joldarda qozǵalys qaýipsizdigin qamtamasyz etý mańyzdy. Osyǵan baılanysty óńirde qaýipti 22 ýchaske anyqtalyp otyr.

— Atap aıtqanda, qar basý qaýpi bar 15 ýchaskede qar toqtatatyn qalqandar ornatylyp, arnaıy transheıalar qazylǵan. Bul qardyń jolǵa jınalýyn azaıtyp, boran kezinde kólik qozǵalysyna kedergi keltirmeýge baǵyttalǵan. Al qar kóshkini júrýi múmkin jeti ýchaske erekshe baqylaýǵa alynyp, qosymsha qaýipsizdik sharalary qarastyrylǵan, — dep habarlady ShQO TJD.

Joldardyń qysqa daıyndyǵy aıasynda 130 ýaqytsha jol belgisi jáne 4 myńǵa jýyq baǵyttaýshy baǵana ornatyldy. Olar qalyń qar men boran kezinde júrgizýshilerge joldyń shetin baǵdarlaýǵa kómektesedi.

Sonymen qatar 1 666 sý ótkizý jáne basqa da jasandy qurylymdar men olarǵa kireberis joldar tazartylyp, 85 kópir retke keltirildi.

Jol jaǵdaıyn táýlik boıy baqylaý úshin 1 qarashadan bastap dıspetcherlik qyzmetter kúsheıtilgen rejımde jumys istep keledi. Mamandar trassalardyń jaǵdaıyn qadaǵalap, arnaıy tehnıkanyń jumysyn úılestiredi. Qandaı da bir qaýip týyndaǵan jaǵdaıda tıisti qyzmetterge jedel habar beriledi.

Eske salsaq, osyǵan deıin SQO-da qysta jalpy uzyndyǵy 156 km bolatyn qaýipti 86 jol ýchaskesi bar ekendigi habarlanǵan.