ShQO joldarynda qarasha aıynan bastap táýlik boıy kezekshilik júrgiziledi

ÓSKEMEN.KAZINFORM – Shyǵys Qazaqstan oblysynda qys mezgiline daıyndyq júrgizilip jatyr.

Jyl saıyn Shyǵystyń qaharly qysynda jolda qalatyn kólikter az emes. Tipti 12 saǵattap qar qursaýynda qalýǵa májbúr bolyp jatady.

Endi 1 qarashadan bastap óńirde joldardaǵy jaǵdaı, paıdalanylyp jatqan tehnıka jáne tótenshe oqıǵalarǵa jedel den qoıý boıynsha táýlik boıy kezekshilik uıymdastyrylady. Bul týraly oblystyq Jolaýshy kóligi jáne avtomobıl joldary basqarmasynan málim etti. 

Kún saıyn tańerteń joldardyń jaı-kúıine qatysty jınaqtalǵan aqparat tótenshe jaǵdaılar qyzmetine, polıtsııaǵa jáne oblys ákiminiń orynbasaryna jetkizilip otyrylmaq.

- Jol uıymdarynyń, polıtsııa bólimsheleriniń, tótenshe jaǵdaılar qyzmetiniń, qala jáne aýdan ákimdikteriniń is-qımyl jospary jasaldy. Sondaı-aq barlyq jol qyzmetterimen, trassalyq medıtsınalyq-qutqarý pýnktterimen jáne aýyldyq okrýg ákimdikterimen baılanys ornatylǵan. Ótken qysta úılesimdi jumystyń arqasynda qaıǵyly oqıǵalar bolǵan joq, - dedi basqarma basshysynyń orynbasary Nurbek Turarov.

Eske salsaq, bıyl qańtarda ShQO-da bir kúnde 70-ten astam kólik qar qursaýynda qalǵan bolatyn.