ShQO: joǵalǵan búldirshin 4,5 saǵattan keıin din aman tabyldy
ASTANA.KAZINFORM — Shyǵys Qazaqstan oblysynyń móltek aýdandarynyń birinde ádettegi kún bir otbasy úshin naǵyz synaqqa aınaldy. 3 jasar qyz bala úıden baıqatpaı shyǵyp ketken. Úlkender bar-joǵy birneshe mınýttyń ishinde baladan kóz jazyp qalǵan. Bul týraly Polisia.kz jazdy.
— Basynda ata-anasy óz betterinshe izdegen. Alaıda ár mınýt ǵasyrdaı bolyp, qorqynyshty údete túsken. Jarty saǵattyq nátıjesiz izdeýden keıin olar «102» arnasyna habar bergen. Polıtseıler dereý sıgnaldy qabyldap, shuǵyl is-qımylǵa kiristi. Keshiktirmeı jeke quram jasaqtary jumyldyrylyp, aýlalardy, kósheler men shetkeri aımaqtardy jappaı tekserý bastaldy, — delingen habarlamada.
Tártip saqshylary árbir yqtımal baǵytty tekserip, turǵyndardan surastyrdy jáne jaqyn mańdaǵy aýmaqtardy — aýlalardan bastap ashyq jerlerge deıin muqııat qarap shyqty.
— Іzdeý jumystary shamamen 4,5 saǵatqa sozyldy. Aqyrynda kishkentaı qyz tabyldy. Búldirshindi úıinen 4 shaqyrym jerdegi kóldiń mańynan jedel ýákil Medet Janseıitov taýyp aldy. Polıtseılerdiń júıeli izdeý jumystarynyń arqasynda kishkentaı qyz aman-esen tabyldy, — dep habarlady polıtsııadan.
Qazirgi ýaqytta onyń ómiri men densaýlyǵyna qaýip tónip turǵan joq. Qyzdyń anasy tolqynysyn jasyra almady. Ol polıtseılerge jedeldigi men qyraǵylyǵy úshin shyn júrekten alǵys bildirdi. Bul oqıǵa — árbir ata-anaǵa balalarǵa únemi nazar aýdarý qajettigin taǵy da eske salady. Keıde qas qaǵym sáttiń ózi jaǵdaı baqylaýdan shyǵyp ketýine jetkilikti. ️
Aıta keteıik, buǵan deıin Qosshyda jol jıeginen náresteniń denesi tabylǵan bolatyn.